Дяве ислягь са инсандизни, уьлкведизни кIанзавайди туш. Иллаки гзаф дявейрин цIаярик, къукърумрик акатай, телефвилерин, къурбандрин сагьибар хьайи Россиядин Федерациядиз, адан мулкунал яшамиш жезвай халкьариз. Амма фашистрин гел кьур бандеровчияр, миллетбазар себеб яз, Россия Украинада махсус серенжем тухуниз, стха уьлкве ва халкь фашистрикай азад авуниз мажбур хьана.
Махсус серенжемра, чи уьлкведин вири халкьарин векилри хьиз, Дагъустандин халкьарин кьегьалрини иштиракзава.
ИкI, Донбассдин мулкар фашистрикай азаддай вахтунда кьегьалвал къалурай дагъустанви Нурмегьамед Гьажимегьамедов, сад лагьайди яз, Россиядин Игит лагьай тIварцIиз лайихлу хьана. И йикъара РФ-дин оборонадин министрдин заместитель Юнус-Бег Евкурова Игитдин гъед Гьажимегьамедован уьмуьрдин юлдашдив вахкана.
Россиядин центральный телеканалри гьар юкъуз Украинада кьиле тухузвай махсус серенжемра дирибашвал къалурзавай, миллетбазриз ягъунар кьазвай ва женгинин юлдашар къутармишзавай къагьриманрикай хабарар гузва. Абурун арада лезгиярни ава.
Ингье са шумуд югъ идалай вилик Яру Пайдах авай 1-Брестско-Берлинский инженервилинни саперрин гвардиядин бригададин командир, РФ-дин Яракьлу Къуватрин полковник Камил Сейфединович Салимханован игитвиликай малумарна. Ам КцIар шегьердай я, фадлай Россиядин Федерацияда яшамиш жезва.
РФ-дин оборонадин министерстводин пресс-къуллугъди хабар гайивал, полковник Камил Салимханова регьбервал гузвай подразделениди, нацистрин гуьллейрин харцик чи аскерриз кьве вацIалай элячIдай муькъвер са куьруь вахтунда туькIуьрна, абуруз виликди гьужумдай мумкинвал яратмишна. Идахъ галаз сад хьиз Салимханова чи кьушунар саламатдиз виликди фин патал са шумуд район, рекьер, муькъвер ва дараматар минайрикай михьна. Виниз тир пешекарвилелди, женгинин еке тежрибадалди тафаватлу полковник Салимханова вичин дирибаш гьерекатралди муькъвелай физвай чи аскерар диверсантрин кIеретIди къирмишунин вилик пад кьуна.
Гьа са вахтунда Салимханова, тешкиллувилин, жуьрэтлувилин ерияр ишлемишуналди, Украинадин миллетбазрин гъилик квай мулкарай инженервилин къадалай виниз техника Донбассдихъ акъудна, гьакIни женгерин нетижада къайдадикай хкатнавай яракьрал чан хкана. Ихьтин мисалар мадни гзаф гъиз жеда.
Абад Азадов
