Цмуррин юкьван школадин бинедаллаз республикадин “2021-йисан муаллим” конкурсдин СтIал Сулейманан райондин муниципальный пай кьиле фена. Ам ачухунин мярекатда райондин кьил Нариман Абдулмуталибова, образованидин управленидин начальник Гьуьсейн Шихбабаева иштиракна.
Конкурсдин муниципальный пай “Методикадин устIархана” ва “Тарс” хилерай кьиле фена. Ана Эминхуьруьн юкьван школадин сифтегьан классрин муаллим Тамила Тагьировади, Цмуррин юкьван школадин сифтегьан классрин муаллим Дуьлбер Гьажибеговади, Герейханован 1-нумрадин ва Курхуьруьн 1-нумрадин юкьван школайрин урус чIалан ва литературадин муаллимар тир Гьамият Зейнудиновадини Милейсат Межидовади, Агъа СтIал-Къазмайрин юкьван школадин ва Кьасумхуьруьн 2-нумрадин юкьван школадин математикадин муаллимар тир Надежда Фатаховадини Аксана Гьажибеговади, ЦIийи поселокдин юкьван школадин химиядин муаллим Саида Абдурагьимовади ва Цицикрин юкьван школадин биологиядин муаллим Айна Имамовади иштиракна. Абурун устадвилиз ва алакьунриз жюриди (председатель — райондин образованидин управленидин начальникдин заместитель Къачабег Аминов) къимет гана.
Конкурсдин нетижада “2021-йисан муаллим” тIварцIиз Агъа СтIал -Къазмайрин юкьван школадин математикадин муаллим Надежда Фатахова лайихлу хьана. 2-чка Милейсат Межидовади (Курхуьруьн 1-нумрадин юкьван школа), 3-чкаяр Айна Имамовади (Цицикрин юкьван школа), Дуьлбер Гьажибеговади (Цмуррин юкьван школа) ва Саида Абдурагьимовади (ЦIийи поселокдин юкьван школа) кьуна.
Гъалиб хьайи муаллим Надежда Фатаховади республикадин конкурсдин зонадин паюна иштиракда.
Хазран Кьасумов
