И йикъара Кьурагьрин сад лагьай нумрадин юкьван школада 2-4-классрин са жерге аялрин арада, ДАССР-диз талукьарна, чи шаирри туькIуьрнавай шиирар хуралай кIелунай конкурс кьиле тухвана. Конкурс тешкилайди ва ам кьиле тухвайди школадин дидед чIалан муаллим Семедова Гьамият я.
Сифте гаф рахуналди, муаллимди Дагъустан АССР арадал атуникай куьрелди суьгьбет авуна ва и мярекат тешкилунин кьилин метлеб вуч ятIа, гегьеншдиз ачухарна. Гуьгъуьнлай аялри лезги шаиррин чIалар хуралай кIелиз башламишна. ИкI, мисал яз, 2“а” классдин ученица Семедова Фатимади, 3“а” классдин ученица Хийирбегова Марьяма, 4“а” классдин ученик Исакьов Амира ва гьакI хейлин маса аялрини Дагъустандиз талукь шиирар хуралай кIелунин карда чпин устадвал къалурна. Жюридин членар гъвечIи артистрин алакьунрилай рази яз амукьна. Инал кIватI хьанвайбуруз лезги шаирри Дагъустандиз гьихьтин къимет ганатIа, ачухдаказ акуна.
— Гьуьрметлу муаллимар, чи гьуьрметлу аялар, — лагьана конкурсдин нетижаяр кьурдалай кьулухъ рахай школадин директор Мисриев Гьамид муаллимди, — чахъ районда, гьакI республикадани жуьреба-жуьре олимпиадайрани конкурсра иштиракна, гьакIни спортдин рекьяй, кIелунин маса хилерайни кIвенкIвечи чкаяр кьур аялар хьайиди сир туш. Ингье къе куьнени чаз ачухдаказ куь агалкьунар къалурна. Инал шиирар кIелунин карда квехъ хъсан агалкьунар авайди чаз акуна. Амма чаз гзаф таъсир авурди а кар хьана хьи, куьне, конкурсда иштиракдайла, алукIнавай алатай заманадин парталри и мярекатдиз кьетIен рангар гана.
Машаллагь. И кIвалах чна ерли гуьзлемишнавачир. Гележегда куьне чIехи сегьнейрани и рекьяй кIвенкIвечи чкаяр кьадайдак умуд кутаз кIанзава. Сагърай куьн.
Конкурсдин нетижаяр кьурла, малум хьайивал, сад лагьай чкадиз Агьмадова Хадижа (4“а” класс), кьвед лагьайдаз — Будаев Мегьамедрагьим (4“б” класс) ва пуд лагьай чкадизни Хидирнабиева Диана (3“б” класс) лайихлу хьана. Школадин дирекциядин патай конкурсдин иштиракчияр тир вири аялриз гьуьрметдин грамотаяр гана.
Марина Юсуфова, муаллим
