ЦIийи ктабар

И йикъара  “Мавел” чапханада урус чIа­лал сифте яз РД-дин лайихлу муаллим, хъсан шаир  Гъулангерек  Ибрагьимовадин  “Вилив хуьн”  (“Ожидание”)  ктаб чапдай акъатнава.

Шиирар урус чIалаз машгьур таржумачияр тир Евгений Чеканова, Арбен Къардаша, Мурад Саида ва Гуьзеля Гьасановади элкъуьрнава.

Шаирдин эсерар, мана-метлебдал гьалтайла, са шумуд терефдинбур я.  Ил­лаки кIанивилиз талукь эсерри еке чка кьазва. Хайи диде ва ватан кIан хьунин, абуруз­ датIана вафалувал хуьнин гьиссери кIел­завайбурун рикIерикни гъалаба кутазва.

Дидедин лайлай, гъилерин чим,  та­вази, хъуьруьнарни насигьатар са чIа­вуз­ни рикIелай алудиз жедач, тести­кьар­зава шаирди. Хайи чилин тIебиатдин рангариз, жуьреба-жуьревилиз, сесериз бахшнавай эсеррани шаирди устадвал, руьгьдин ачухвал субутзава.

Аялар патал теснифнавай шиирри кIелзавайбур мадни артух желбзава. Куьрелди, цIийи ктаб лап кутугай сав­­кьат хьанва. Адаз сифте гаф и цIа­рарин авторди кхьена.

Билал  Адилов,

РФ-дин писателрин Союздин член