10 -13-мартдиз Чечнядин Грозный шегьерда азаддаказ кьуршахар кьунай СКФО-дин кIвенкIвечивал къазанмишун патал 18 йисалди яшара авай жаванрин арада акъажунар кьиле фена. ИкI, заланвилин 10 категориядай Дагъустандин хкянавай командадик кваз ана иштиракай 6 спортсменди къизилдин медалар (вири санлай — 21 медаль) къазанмишна. Абурун арада чи ватанэгьли, спортдин и жуьредал машгъул жез са акьван гзаф вахт алатнавачтIани, вичин устадвал къалуриз алакьнавай Рагьман Малагьмедовни ава. 110 кг-дал къведалди заланвал авайбурун арада ада инанмишвилелди къизилдин медаль, идахъ галаз сад хьиз уьлкведин дережада вичин устадвал къалурдай мумкинвал къазанмишна.
РикIел хкин: Р.Малагьмедов азаддаказ кьуршахар кьунал машгъул жез са йисни зур я. Икьван чIавалди ада грэпплингдай вичин устадвал къалурна, спортдин и жуьредай ада дуьньядин кIвенкIвечивилин тIвар 3 сеферда къазанмишна, гьакI какахьай единоборствойрайни вичин къуватар ахтармишзава.
Рагьманан ери-бине Кьурагьай я. Ам Махачкъалада дидедиз хьана, ада 56-нумрадин гимназияда кIелна. Алай вахтунда ам автодорожный колледждин студент я. Меркезда Олимпиададин резервдин 3-нумрадин спортшколада тренер Гьасан Абдубасирован гъилик устадвал хкажзава. СКФО-дин кIвенкIвечивал патал акъажунра Р.Малагьмедова вири кьуд бягьс кьиле тухвана. Финалда Грозный шегьердай тир Мовсар Сайдулаев адаз 8:2 гьисабдалди кумукьна. Гила Рагьмана ва Дагъустандин командадик квай мад 10 спортсменди апрелдин эвелдай Москвадин патарив гвай Наро-Фоминск шегьерда кьиле фидай Россиядин чемпионатдиз гьазурвал аквазва.
Рагнеда Рамалданова
