И мукьвара РД-дин Гьукуматдин Председателдин заместитель – РД-дин образованидинни илимдин министр Уммупазиль Омарова кlвалахдин рекьяй Мегьарамдхуьруьн райондиз фена. И гьакъиндай «Лезги газетдиз» Мегьарамдхуьруьн райондин администрациядин пресс-къуллугъди хабар гузва.
Министр Буткъазмайрин мектебда райондин муаллимрихъ галаз гуьруьшмиш хьана ва ада 2018-йисан ЕГЭ вахтунилай вилик вахкунин этапдиз гьазурвал акунин рекьяй совещание кьиле тухвана.
Къейд ийин, гуьруьшда РД-дин образованидинни илимдин министрдин заместитель Ширали Алиева, тестированидин Федеральный Центрдин регьбер Юлия Егоровади, Мегьарамдхуьруьн райондин кьилин сад лагьай заместитель Гьабибуллагь Мурадалиева, райондин образованидин управленидин начальник Улубег Абейдуллаева, УО-дин начальникдин заместитель Айна Гьажиевади, ЕГЭ-дин пунктунин регьбер Зарема Маллаевади, мектебрин директорри ва муаллимри иштиракна.
Совещанидин вахтунда абуру ЕГЭ вахтунилай вилик вахкунин этапдиз талукь месэла веревирдна.
Уммупазиль Омаровади рикlел хкана хьи, гьукуматдин нетижайрин аттестация кьиле тухун РД-дин Кьил Владимир Васильеван гуьзчивилик ква.
«Республикадин Кьили образованидин месэлайриз, кьилди къачуртlа, ЕГЭ кьиле тухуниз кьетlен дикъет гузва. Чи макьсад гьахълудаказ имтигьанар кьиле тухун я», — къейдна министрди.
Юлия Егоровадини, Ширали Алиевани къейдна хьи, вилик квай месэла важиблуди, дуьздаказ, гъалатlар квачиз тешкилна кlанзавайди я. И йисуз имтигьанар тухудай пунктар (ППЭ) цlийи басмадин технологиядалди тадаракламишнава. Цlийи технологиядилай гъейри, Рособрнадзордин техникадин ва тешкиллувилин истемишунрив кьурвал, имтигьанар тухудай пунктара (ППЭ) видеогуьзчивал ва мобильный алакъаяр кlевдай тадаракар тайинарнава.
«Лезги газет»
