19-мартдиз Махачкъалада Дагъустандин Кьилин везифаяр вахтуналди тамамарзавай Владимир Васильеван ряегьбервилик кваз кьиле фейи совещанидал алай йисан апрелдин ва майдин варцара республикада азаддиз кьуршахар кьунай тешкилдай Европадин чемпионатдиз талукь месэлаяр веревирдна.
Спортдин важиблу вакъиадиз гьазурвилер акунин жигьетдай РД-дин Гьукуматдин Председателдин Сад лагьай заместитель Анатолий Къарибова гегьенш доклад авуна. Адан гафарай малум хьайивал, акъажунар кьиле фидай спортдин А.Алиеван тIварунихъ галай дворецда сотовый ва Интернетдин алакъа гужлу авунин жигьетдай кIвалахар тамамарна акьалтIарнава. Алай вахтунда спортдин объектдин патарив гвай чкаяр аваданламишунин кIвалахар давам жезва.
Чемпионатда иштиракиз Дагъустандиз къвезвай мугьманар кьабулун патал аэропортуна ва спортдин дворецда кIвалахар кьиле тухудай волонтеррин ва общественный хатасузвал таъминардай къуллугъчийрин сиягьар тестикьарнава. Медицинадин рекьяй таъминардай къуллугъарни фикир тагана тунвач. Чемпионатдин иштиракчийриз ва мугьманриз медицинадин рекьяй къуллугъар ийидай махсус программа кьабулнава. “Анжи-Арена” стадиондин ва спортдин А.Алиеван тIварунихъ галай дворецдин патарив улакьар акъвазарун патал махсус майданарни чара авунва.
В.Васильева акьалтIар тавунвай кIвалахар, энгел тавуна, кьилиз акъудунин тапшуругъ гана. Совещанидин кIвалахда РД-дин Халкьдин Собранидин Председатель Х.Шихсаидова, РД-дин Гьукуматдин Председатель А.Здунова ва масабуру иштиракна.
Чи мухбир
