Муддат артухарнава
Россияда кьезил ипотекадин программа 2024-йисан 1-июлдалди кардик кумукьда. Идакай уьлкведин Гьукуматдин телеграм-каналда хабар гана.
Къейдзавайвал, кьезил жуьредин ипотекадин ставка 8 процентдикай ибарат жеда. Такьатар цIийиз эцигнавай кIваляй квартира ва я чилин участок маса къачун, хсуси кIвал эцигун патал къачудай мумкинвал ава.
Хизандин ипотекадин ставка 6 процент яз амукьда лугьузва. “Ихьтин ипотека 18 йиса тахьанвай кьве аял авай хизанривай къачуз жеда”, — кхьенва чешмеда.
США-дихъ галаз…
“Сад тир Россия” фракциядин кьил В.Васильева Госдумада Москвадинни Киевдин арада рахунар кьиле финин мумкинвилиз баян гана. Адан фикирдалди, Киевдин гьукумдарриз кIан хьуналди, меслятдин рахунар гуьнгуьна гьат хъийидач. “Абур Украинадихъ галаз ваъ, США-дихъ галаз жезвай рахунар я”, — лагьана ада.
Идалай виликни РФ-дин регьбер В.Путина гьуьжетар ислягьвилин рекьелди гьялиз Москва гьазур тирдакай, амма аксивалзавай терефрихъ маса фикирар авайдакай лагьанай.
Польшадиз катнавайбур
Алай вахтунда Польшада Украинадай катнавай 950 агъзур кас ама. Ихьтин фикир, “Новости” РИА-ди хабар гайивал, Польшадин еримлувилин фондунин векил Б.Марчука малумарна.
Къейдзавайвал, 2022-йисан гатун вахтунда Украинадай Польшадиз катнавайбурун кьадар 1,4 миллион касдив агакьнавай. Абурун 90 процент дишегьлийрикайни аялрикай ибарат я.
Польшади, Россиядиз акси тирди къалуруналди, Украинадиз пулунин жигьетдай еке куьмекар авунва.
Кьабулзавач
2022-йисан эхирра Киевдин гьукумдарри Евросоюздиз, НАТО-диз Россия ООН-дин Совбездикай хкудуниз эвер ганай. “Чаз дуьньядивай кар кьетIдай гьерекатар герекзава”, — лагьанай Украинадин МИД-дин кьил Д.Кулебади.
“Новости” РИА-ди хабар гайивал, Киевдин теклифдиз гзаф уьлквеяр акси я. “И дуьшуьшда фикирда кьун важиблу я хьи, Россия ООН-дин Совбездикай хкудуниз талукь Украинадин тереф дуьньядин дережада гзафбуру хуьзвач”, — лагьана Эстониядин МИД-дин векилди. Ада и месэла кьилиз акъат тийидайди яз гьисабзава.
Къейд ийин, ООН-дин Уставдин 23-статьядал асаслу яз, Совбездин гьамишалугъ членрик Россия, США, Китай, Великобритания ва Франция акатзава. И уьлквейрихъ гьар садахъ кьилдин кьетIен ихтиярар ава.
Маса гун акъвазарзава
Россиядин интернет-туьквенрай ва маркетплейсрай “Хагги Вагги” къугъунаг (игрушка) акъудзава. Роскачестводи дуьздал акъуднавайвал, и къугъунагрик химиядин хаталу затIар ква.
2022-йисан декабрдин эхирра малумарай ахтармишунрин нетижайри къалурнава хьи, пешекарри килигай чешнейрин 89 процентдик кьадардилай артух фенол кваз хьанва. ГьакIни абурухъ талукь тир сертификатар авачирди тайинарна.
Россиядин машгьур “Ozon”, “Wildberries”, “Яндекс Маркет” ва “СберМегаМаркет” маркетплейсри “Хагги Вагги” къугъунагар алай метягьрин карточкаяр интернетдин чинрай, сайтрай ахкъуднава. “Детский мир” туьквенри къугъунагар туькIуьрзавай тешкилатривай тикрар хъувунвай имтигьанрин нетижаяр истемишнава. Тестикьар тавуртIа, туьквенриз ахъаюнал къадагъа эцигдайвал я.
Аслу тежедайвал
Металлургиядин промышленность еримлу авунин стратегияди макроэкономикадин вири дегишвилер фикирда кьазва, и хилен аслу туширвал мягькемарун важиблу я. Ихьтин фикир РФ-дин премьер-министр М. Мишустина лагьана.
Къейд авурвал, цIийи шартIара иллаки хаммалдиз, ам гьялуниз, гьакIни герек тир вири технологийриз ва тадаракриз талукь яз масадалай аслу тахьуниз фикир гана кIанзава.
Маймунди чуьнуьхна
Таиланддин Сисакет вилаятда авай милли паркуна туристкадин гзаф кьадар пул авай чанта маймунди чуьнуьхна ва кьвалалай гадарна. Идакай “The Thaiger” чешмеди хабар гана.
Пул ва къиметлу затIар авай чанта чуьнуьхайдалай кьулухъ 55 йисан яшда авай туристкади рейнджерривай куьмек тIалабна. Сиягьатчиди вичивай вагьши маймунди чанта къакъудай тегьердикай ихтилатна. Чанта гъиле гьатай маймундиз сифтедай анай недай затI жагъуриз кIан хьана, авачиз акурла, ада чанта уьцIенвай чкадилай агъуз вегьена. Пулунилайни къиметлу затIарилай гъейри, чантада сиягьатчидин документарни авай.
Рейнджерар чанта жагъурунин мураддалди уьцIенвай чкадай 100 метрдин агъуз эвичIна. Къиметлу затIар чпи чуьнуьх хъувуна лагьана тахсир кутун тавун патал рейнджерри телефондин куьмекдалди соцсетда трансляция тешкилнавай. Сиягьатчидин чантадилай гъейри, рейнджерриз мад хейлин затIар жагъун хъувуна. Гьабурни маймунри гадарнавайбур яз хьун мумкин я лугьузва.
«Лезги газет»
