Джонсонан ният
Великобританиядин виликан премьер-министр Борис Джонсонахъ элкъвена и къуллугъдал хкведай ниятар ава. Идакай “The Sunday Times” изданиди хабар гузва.
Джонсонан фикирдалди, уьлкведа гьукумдин кьилиз вуж атайтIани, и кар консервативный партия патал еке бедбахтвилиз элкъведа. Идалай кьулухъ Великобританияда гьалар пайгардик анжах са адавай кухтаз жеда.
Чешмедин малуматралди, премьер-министр хкядай сечкийра иштиракун патал уьлкведин финансрин виликан министр Риши Сунакан ва къецепатан крарин министр Лиз Трассан кандидатурайрихъ галаз санал Борис Джонсонан кандидатурани кутунин тереф консервативный партиядин 7000-далай виниз членри хуьзва.
РикIел хкин, алай йисан 7-июлдиз Б.Джонсон премьер-министрдин къуллугъдилай элячIна. Ада ихьтин къарар уьлкведа арадал атай сиясатдин кризисдихъ галаз алакъалу яз кьабулна.
Газдин кьитвал
Великобританияда газдин кьитвилин вилик пад кьун патал чкадин агьалийриз кIвалера газ ва электроэнергия кьенят авуниз эвер гун мумкин я. Идакай “Telegraph”-ди хабар гузва.
Чешмедин делилралди, Европадин союздик акатзавай уьлквейра къведай вацралай ишлемишзавай газдин кьадар 15 процентдин тIимиларда. Къейд ийин хьи, ихьтин къарар хъуьтIуьз газдин кьитвал тахьун патал кьабулнава.
Европадин са жерге уьлквейра ихьтин гьаларал атунин кьилин себеб Урусатди “Северный поток — 1” турбадай къецепатан уьлквейриз ахъайзавай газдин кьадар тIимиларун я. Муракаб гьалар иллаки Германияда, Австрияда ва Францияда арадал атанва.
Шольцак тахсир кутазва
Немсерин “Welt am Sonntag” газетди Украинадив яракь агакьарун яргъал вегьинай Германиядин федеральный канцлер Олаф Шольцак тахсир кутунва.
Изданидин малуматралди, Киевдиз “IRIS-T SLM” къурулушар маса къачуз кIанзава. Абурун куьмекдалди асул гьисабдай самолетар, вертолетар, пилот галачиз лув гудай аппаратар, жуьреба-жуьре ракетаяр язава.
Киевди чпиз и жуьредин яракь герекзавайдакай гьеле июлдин эвел кьилера хабар ганай. ФРГ-дин экономикадин минис-терстводи Украинадин патай атанвай тIалабун кьилиз акъуддай къарарни кьабулна. Амма и месэладиз талукь эхиримжи къарар федеральный канцлердин ведомстводи кьабулна кIанзава. Анжах эхиримжи пуд гьафтедин къене Шольцан администрацияди и месэладай са жуьредин къарарни кьабулнавач.
ЛДПР-дин теклиф
Госдумада Москвада авай Киевдин вокзалдин тIвар дегишарун теклифнава. Ихьтин теклиф ЛДПР-дин патай депутат Василий Власова ганва.
“Подъем” изданидин малуматралди, Киевда Москвадин проспектдин тIвар дегишарнава. Депутатди, Украинади кьабулнавай къарардиз жаваб яз, Москвадани вокзалдин тIвар дегишарун герек тирди къейдна.
Виликдай и вокзалдал “Брянскдин вокзал” тIвар алай. 1934-йисуз адан тIвар дегишарнай. В.Власова вокзалдиз виликан тIвар хгун патал Москвадин мэр Сергей Собяниназ чар рекье твадайвал я.
Къати марфар къуникди
Алатай гьафтедин эхирра къати марфар къуникди Сочида кьетIен гьаларин режим малумарна. Идакай вичин Телеграм-каналда шегьердин мэр Алексей Копайгородскийди хабар гана.
Адан гафаралди, пуд йикъан къене къвайи марфари шегьердин хейлин районриз еке хасаратвилер гана. Селдин хурук акатай са дишегьли телеф хьана, цIудралди инсанар къутармишиз алакьна. А.Копайгородскийди къейд авурвал, ихьтин марфар Сочида эхиримжи йисара ерли къванвачир.
Къати марфар къунин нетижада яд акьалтуникди хейлинбурун улакьризни еке зиянар хьана. Бязибур лагьайтIа, гьатта ремонт хъийидай гьалдани амач. Абуруз пулдин куьмекар гун патал шегьердин гьукумдин кьилевайбуру страховой компанийрихъ галаз рахунар кьиле тухузва.
Мехъерик — кьиникь
Ирандин Фирузабад шегьерда свас вичин мехъерик телеф хьана. “The Sun” изданиди хабар гузвайвал, кьиникьин себеб бедбахтвилин дуьшуьш я.
Махваш Лехеян 24 йис тир. Мехъер къизгъин тир арада мугьманрикай сада гъуьрчехъандин тфенгдай гуьллеяр ахъайна. Абурукай сад сусан кьилихъ галукьна.
Махваш Лехей тади гьалда азарханадиз агакьарнатIани, духтурривай адаз куьмекиз хьанач. Тфенгдай ягъайди чамран имидин гади тир. Дуьшуьшдилай гуьгъуьниз катай ам, са кьадар вахт арадай фейила, чкадин къанун-къайда хуьдай органрин векилри кьуна. Малум хьайивал, адаз тфенгдай ягъиз ерли чизвачир.
Гьазурайди — Агьмед Магьмудов
