Кьилин редактордин гаф
22-июлдиз Махачкъалада, “Дагестанская правда” газетдин редакцияда, РД-дин милли сиясатдин ва динрин крарин рекьяй министр Энрик Муслимован иштираквал аваз кьиле фейи пресс-конференциядал Дагъустандин милли чIалариз, халкьарин арада авай алакъайриз, Дагъларин уьлкведин медениятдин девлетлу ирсиниз, республикадилай, уьлкведилай къецепата яшамиш жезвай ватанэгьлийриз талукь важиблу са шумуд месэла веревирдна.
Мисал яз, авар чIалал акъатзавай “Гьакъикъат” газетдин редакциядин илимдин ва образованидин отделдин редактор Кавсарат Сулеймановади эхиримжи йисара образованидин хилез талукь яз федеральный дережадаваз кьабулнавай бязи къанунар себеб яз, мектебра милли чIалар чирунин кIвалах зайиф хьанвайди къейдна. Кьилди къачуртIа, ихтилат мектебра кIелзавай аялриз чирун патал чпиз кIани чIал хкядай ихтияр гузвай къанундикай физва. Ам кьабулайдалай кьулухъ гзаф кьадар мектебра, иллаки шегьердин чкада, хайи чIалар чирзавай аялрин кьадар садлагьана тIимил хьанва. И кардин вилик пад кьун патал К.Сулеймановади мектебра милли чIалар чарасуз яз чирун республикадин дережада аваз къанундалди мягькемарун теклифна.
Энрик Муслимова, и теклифдин гьакъиндай баянар гудайла, къейд авурвал, К.Сулеймановади къарагъарнавай месэлаяр образованидин ва илимдин министерстводиз талукьбур я. ЯтIани ада хайи чIалар хуьникай вичин фикирни лагьана: “Ша чун вири хайи чIаларал рахан. Гаф авач, урус чIал галачиз чаз уьмуьрда четин жеда, анжах ам милли чIалар рекьизвай къуватдиз элкъведайвал авуна кIандач. Государстводи гьихьтин къарарар кьабулайтIани, эгер диде-бубайрихъ чпин веледриз хайи чIал чирдай къаст авачтIа, са затIни дегиш жедач. За государстводи ва гьукумди абур хуьнин карда тайин тир чка кьазвайди инкарзавач, амма чара ийизвай пулдин такьатрикай гьамиша куьмек жезвач”.
Мадни Э.Муслимован гафарай малум хьайивал, алай йисуз РД-дин милли сиясатдин ва динрин крарин рекьяй министерстводи милли чIаларал мектебдилай къецепата кIелдай литература акъудун патал государстводин программадин сергьятра аваз 600 агъзур манат чара авунва. ГьакIни министерстводи милли чIаларал ктабар гьазурзавай, амма абур чапдай мумкинвилер авачир авторризни куьмекзава.
Жуван нубатда за Энрик Муслимовавай кьве кар тIалабна: Азербайжанда авай лезги хуьрерин мектебриз Дагъустандай ктабар рекье тунин карда куьмек гун ва гьана яшамиш жезвай лезги эдебиятдик, медениятдик кьетIен пай кутазвай чи бажарагълу ватанэгьлийрин зегьмет Дагъустан Республикадин государстводин шабагьар гуналди къейд авун.
Жуьреба-жуьре чешмейрай чав агакьзавай малуматрай хабар жезвайвал, Азербайжанда авай лезги хуьрерин мектебра аялриз лезги чIал чирдай ктабрин патахъай еке кьитвал ава. И карда абуруз чалай алакьдай куьмек гун патал чаз чпихъ мумкинвилер авай, хайи чIалахъ рикI кузвай стхайрин куьмекдалди анриз лезги чIалай ктабар рекье тваз кIанзава. Амма государстводин часпардилай абур а патаз акъудун муракаб месэла я. Э.Муслимовани и месэла гьакъикъатдани муракабди тирди хиве кьуна ва вич и карда вичелай алакьдай куьмек гуз алахъда лагьана. “Дагестанская правда” газетдин кьилин редактор Бурлият Токболатовади заз и месэладин патахъай РФ-дин къецепатан крарин министерстводин РД-да авай Векилханадиз хабар гун теклифна.
Кьвед лагьай месэладин патахъай баянар гудайла, Энрик Муслимова хабар гайивал, алай вахтунда Дагъустанда республикадилай, уьлкведилай къецепата яшамиш жезвай ватанэгьлийриз жуьреба-жуьре рекьерай куьмекар гун патал махсус программа кьабулзава. Адан сергьятра аваз государстводин шабагьар гунин месэлани гьялда.
Гьакъикъатдани, алай вахтунда Азербайжанда чи милли эдебиятдик, медениятдик кьетIен пай кутазвай векилар тIимил авач. Фикирдиз Седакъет Керимовадин, Муьзеффер Меликмамедован, Эйваз Гуьлалиеван, Магьира Шириновадин, Бажиханум Исаевадин, Зарифа Кьасумовадин, Руслан Шейдаеван ва масабурун тIварар къвезва. ГекъигайтIа, абуру лезги эдебиятдик, медениятдик Дагъустанда чпиз государстводин шабагьар ганвай бязи ватанэгьлийрилай гзаф пай кутунва. Амма абур хъендик кумукьзава. Э.Муслимова тIвар кьур программадин куьмекдалди абурун зегьметдиз кутугай къимет гуз жедайдак чна умудар кутазва.
Мегьамед Ибрагьимов, кьилин редактор
