Къанун кьабулна

Кьвед лагьай сеферда веревирд хъувурдалай кьулухъ Госдумади россиявийри чпин кIвалер (майишатар) газдин турбайрихъ гьавая галкIуруниз талукь законопроектдик кухтур дегишвилер кьабулна. И теклиф алай йисан 21-апрелдиз РФ-дин Президент В.Путина Федеральный Собранидиз ракъурай Чарче малумарнай.

“ТАСС” чешмеди тестикьарзавайвал, цIийи къанунди агьалийрин чилин участокрал кьван газдин турбаяр пулсуздаказ тухудай мумкинвал гузва.

Умуд кутаз тежедай амадаг

Россиядин къецепатан крарин министр С.Лаврова Евросоюз умуд кутаз тежедай амадаг я лагьана. Дипломатдин гафар “ТАСС” чешмеди раижнава.

Министрди къейд авурвал, европавийри, гьакъи гуниз талукь (платёж) вири халкьарин SWIFT системадикай Россия хкудда лу­гьуз, гьелягьар кьазва.  С.Лаврован гафаралди, Москвадиз чпин патай ихьтин рафтарвилер къалурзавай Европадин гьукумдарар умуд кутаз тежедайбур я.

Идалай вилик Россиядин МИД-дин экономикадиз талукь департаментдин кьил Д.Биричевскийди уьлкведа SWIFT эвездай­ цIийи система кардик кутазвайдакай хабар ганай. Ада тестикьарайвал, Россия SWIFT системадикай хкудунин рахунар гьелелиг кьиле физвач, амма и кардиз виликамаз гьазур хьун важиблу яз гьисабзава.

Къейд ийин,  SWIFT информация агакьардай, банкарай банкариз пулар ракъурдай вири халкьарин система я. Алай вахтунда аник  жуьреба-жуьре уьлквейрин 11 агъзурдалайни гзаф чIехи тешкилатар ква. Россияни адакай гегьеншдиз менфят къачузвай уьлквейрикай сад я.

Дустагъдай экъечIдай ашкъи авач

Индиядин Уттар-Прадеш штатдин кIуьд дустагъханада ацукьарнавай 20-далайни гзаф тахсиркарриз, муддат куьтягь тахьан­маз, шартIуналди азадвал гайила, абуруз дустагърай экъечIиз кIан хьанач. Идакай “India Today” чешмеди хабар гузва.

Абурун гафаралди, уьлкведа тIугъвалди агъавалзавай ма­къам­да сагъламвилин хатасузвал патал дустагъда амукьун хъсан я. Ина абур дарманралди таъминарзава, вахт-вахтунда медкъул­лугъчийри сагъламвал ахтармишзава…

Индияда коронавирусдик 329 агъзурдалайни гзаф инсанар кьена. ТIугъвалдин муддатда виридалайни гзаф США-да инсанар телеф хьана — 600 агъзурдав агакьзава.

Коронавирус акатнавайбурун кьадар виридалайни гзаф США-да­ ава. Адан гуьгъуьнал Индия, Бразилия, Франция, Туьркия, Рос­сия, Великобритания, Италия, Аргентина, Германия, Испания ала.

Зарарлу серенжемар

Минскдиз акси санкцияр кардик кутуналди, ЕС-ди “вичин кIва­чиз гуьлле гун” лазим жезвач, амма Ryanair тешкилатдин самолетдихъ галаз алакъалу агьвалатдин патахъай Белоруссия­дин гьукумдарриз жаваб гун чарасуз я. “Новости” РИА-диз ихьтин фикир экономикадин ва энергетикадин рекьяй Германиядин бундестагдин (федеральное собрание) кьил К.Эрнста малумарна. Адан фикирдалди, уьлквейри сада муькуьдаз талукь яз кардик кутазвай санкцийри кьве терефдизни зарар гузва.

“Россиядиз малумарнавай санкцияр къуватдай вегьинин патахъай зун эхиримжи са шумуд йисуз рахана. А санкцийри чаз са менфятни ганач. Абуру гьам Германиядин, гьамни Россиядин экономикадиз, идалайни гъейри, гележегда алакъалувилелди кIвалахунин серенжемриз манийвал гузва. Амма Белоруссиядин гьукумдарри чеб тухузвай гьал рази тежедайди я… Ихьтин вахтунда Европади вуч авун лазим ятIа, гьадакай фикирна кIан­зава. Гьа са вахтунда “жуван кIвачиз гуьлле” гун тийидайвал хьана кIанда”, — лагьана Германиядин векилди.

Алакъаяр чIурдач

Евросоюздин мураддизни килиг тавуна, Сербияди Россиядизни Китайдиз акси санкцияр кардик кутуниз рехъ гудач. Ихьтин зенд уьлкведин президент А.Вучича малумарна, хабар гузва “ТАСС” чешмеди.

“Евросоюздин рекьел алай бязи уьлквейри хьиз, Сербияди Россиядихъни Китайдихъ галаз авай алакъаяр чIурдач. Чна я Рос­сиядиз, я Китайдиз талукь санкцияр кардик кутадач”, — кье­тIиви­лелди лагьана Сербиядин регьберди. Ада алава хъувурвал, уьлкведиз Россиядихъни Китайдихъ галаз лап хъсан алакъа­яр ава.

Хийирлу емиш

Америкадин пегьризчи Эми Гудсона майвайрикайни емишрикай виридалайни менфятлубур куьлуь емишар (ягода) я лагьа­на. Идан гьакъиндай “Лента.ру” сайтда кхьенва.

Пешекардин фикирдалди, муькуь майвайрилайни емишрилай гъейри, куьлуь емишрик витаминар ва маса хийирлу затIар гзаф ква. И кар себеб яз, абуру тIуьрди иливарунин карни хъсанар­зава, яхун жез кIанзавайбурузни куьмекзава. Гудсонан фикирдалди, куьлуь емишрикай гзафни-гзаф мунакI (черника) хийирлу я — адак виридалайни пара антиоксидантар ква.

«Лезги газет»