Алатай гьафтедин хемис юкъуз “Лезги газетдин” редак­ция­да рамазандин вацра газет кIел­завайбурун арада Ислам диндай кьиле тухвай конкурсдин нетижаяр кьуниз талукьарнавай мярекат кьиле фена. Ана “Лезги газетдин” кьилин редактор Мегьамед Ибрагьимова, адан заместитель Куругъли Ферзалиева, диндин алим, конкурсдин жюридин председатель Ямин гьажи Мегьамедова, “Къурушрин сес” газетдин кьилин редактор Муса Агьмедова, редакциядиз датIана жуьреба-жуьре рекьерай куьмекар гузвай амадаг Шагьпаз Асаханова ва масабуру иштиракна.

РикIел хкин, конкурс тухунин кьилин макьсад газет кIелзавай­бурухъ диндин рекьяй авай чир­ви­лер артухарун, инсаният патал Ис­ламдихъ авай метлеб, кье­тIен­вал къалурун, кIелзавай­бурун ара­­дай диндай дерин чирвилер авайбурун алакьунар къейд авун тир.

Мярекатдин иштиракчийрин вилик рахадайла, Мегьамед Ибрагьимова къейд авурвал, диндин конкурс гьар йисуз тухузва.

Конкурсдин нетижаяр кьурдалай кьулухъ малум хьайивал, 1-чка — Демир Шагьбанова (Сулейман-Стальский район), 2-чка — Мухлуса Гьуьсейновади, 3-чка Фе­рид Вагьабова (кьведни Мегьа­рамдхуьруьн райондай) кьуна. Кьи­лин савкьат — “Xiaomi Redmi Note 10 64 Гб” маркадин смартфон ва 3 агъзур манатдин кьадар­да авай пулдин пишкеш Демир Шагьбановав вахкана. М.Гьуьсейновани Ф.Вагьабов махсус савкьатриз ва 2,1 агъзур­ манатдин кьа­дарда авай пулдин пишкешриз лайихлу хьана. Гъалибчий-риз­ гьакIни дипломар, “Пак Къу­ръ­­­ан ва адан манайрин таржума лезги чIалал”, “Мугьаммад пайгъамбардин (къуй Аллагьдин патай салават ва саламар хьурай вичиз) уьмуьрдин рехъ”, “Исламдин эдебар, ахлакьар ва дуьаяр” ктабар ва “Замзам” яд гана.

Мярекатдин эхирдай тешкилатчийри къейд авурвал, къведай йисуз конкурсдин сергьятар авайдалай гегьеншарда ва кьилин савкьатрик гьаждиз ва я умрадиз фидай путевка кутун фикирдик ква.

Агьмед Магьмудов