Аксивал малумарзава
Украинадиз РагъакIидай патан уьлквейри яракьрин жигьетдай гузвай куьмекар давамарун хиве кьазва. Гьа са вахтунда бязи уьлквейрин халкьар Россиядиз акси санкцияр кардик кутуниз, Украинадиз яракьар ракъуруниз акси я.
ООН-да США-дин векилди къейднавайвал, Вашингтонди Украинадиз анжах часпарар хуьн патал яракьар ракъурда. Идакай “Новости” РИА-ди хабар гана.
Грециядин оппозициядин “СИРИЗА” партиядини Украинадиз бронетехника ракъуруниз аксивал малумарнава.
Малум тирвал, Евросоюздин саммитдилай кьулухъ Германиядин канцлер О.Шольца Грецияди Украинадиз советрин вахтарин жуьредин танкар ракъурда лагьанай. Берлинди танкарин эвездай Грециядиз чпин бронированный улакьар гуда. Шольцан гафаралди, Брюсселда кьиле фейи гуьруьшдал ам грекрин премьер К.Мицотакисахъ галаз танкаринни улакьрин гьакъиндай икьрардал атана.
“Грециядин премьер-министрди вичин пресс-конференциядал идан гьакъиндай са гафни лагьанвач. Гьавиляй чна ихьтин хабар грекриз Германиядин канцлердивай ван хьун кьиле ацакь тийидай фикир яз гьисабзава”, — лугьузва “СИРИЗА” партиядин векилри.
Грекрин оппозициядин партияди къимет ганвайвал, Греция Украинадин къалмакъалдал желб авун уьлкведин милли итижар патал хаталу я.
“Мицотакисан гьукуматди милли важиблу месэлайрин патахъай сирлу къарарар кьабулунин гьерекатар акъвазарун герек я. Иллаки чIехи пай грекри уьлкведин хатасузвал къурхулувилик кутадайбур яз гьисабзавай къарарар. Украинадиз ракъурай ва ракъурзавай яракьрин гьакъиндай, Европадин вири гьукуматри хьиз, Грециядин гьукуматдини информация раижун чарасуз я”, — малумарна партиядин векилри.
Малум тирвал, РФ-дин Президент В.Путинан къарардалди, Донбасс хуьнин макьсаддалди Украинада 24-февралдилай чи Яракьлу Къуватри кьиле тухузвай военный махсус серенжем давам жезва.
1-июндиз РФ-дин оборонадин министерстводи малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 185 самолет ва 129 вертолет, зенитный ракетайрин 326 комплекс, пилот галачиз лув гудай 1077 аппарат, 3363 танк ва дяведин маса машинар, РСЗО-дин 457 установка, артиллериядин ва маса 1744 яракь, дяведин суьрсет, военный махсус 3329 автомобиль тергна.
Уьлкведал дамахзава
Сербиядин президент А.Вучича, дуьньядин алаш-булаш гьаларизни килиг тавуна, РагъакIидай патаз, Россиядиз аксивилер авуниз рехъ гун тийизвай вичин уьлкведал дамахзава. “Новости” РИА-ди хабар гузвайвал, ихьтин гафар Сербиядин регьберди уьлкведин кьиле кьвед лагьай сеферда хкя хъувуниз талукь тир кьин кьурдалай кьулухъ малумарна.
Сербияда 3-апрелдиз кьиле фейи президентдин сечкийра Вучичаз 58,59 процентдин сесер хьана.
Китайди США тагькимарна
Тайвандин крарин рекьяй КНР-дин Госсоветдин векил Ч.Фэнляна малумарайвал, Тайвандин кьиле авайбуру аслу тушир островда гъулгъула тун патал Китайдиз акси къецепатан чIулав къуватар желбуниз талукь алахъунар кьилиз акъатнач. Идакай “Новости” РИА-ди хабар гана.
“Чна США-динни Тайвандин арада официальный алакъаяр хьуниз ва абуру военный рекьяй гафар-чIалар сад авуниз кьетIивилелди аксивал ийизва”, — лагьанва Ч.Фэнлянан малуматда. Ада къейд авурвал, островдин аслу туширвилин тереф хуьзвай сепаратистрин къуватриз куьмек гун хаталу я.
КНР-дин гьукуматдин ва адан островдин вилаятдин арада авай официальный алакъаяр 1949-йисуз кьатI хьана.
Уьмуьрдин яргъивилин сир
Америкадин 103 йис тамам хьанвай агьалиди вичин уьмуьрдин яргъивилин сир аквааэробикадихъ галаз алакъалу я лагьанва. Чкадин чешмейрал асаслу яз, идакай “Лента.ру” сайтди хабар гана.
Яргъи уьмуьр кечирмишнавай америкави Ч.Дункана дуьздаказ уьмуьр кьиле тухуниз, тIуьниз ва датIана са квел ятIани машгъул хьуниз эвер гузва.
Идалай вилик США-дин са агьалиди 102 лагьай хайи югъ къейднай. Ада вичин уьмуьр яргъи хьунин себеб незвай суьрсетар кIвалинбур хьунихъ галаз алакъалу я лагьанай.
Ракетаяр ахъайна
Украинадин яракьлу кьушунри “Град” системадай (РСЗО) Донецкдин Куйбышевдин райондихъ 10 ракета ахъайна. Идакай “Новости” РИА-ди хабар гана. Украинадин кьушунри арбедин экуьнахъ ДНР-дин Макеевкадизни, Гольмовскийдизни, Пантелеймоновкадизни, Ясиноватаядизни, 13 декьикьадин къене 18 снаряд ахъаюналди, цIай гана.
ЛНР-дин халкьдин милицияди малумарзавайвал, эхиримжи суткада Украинадин кьушунар 43 миллетбаздикай ва 3 БТР-дикай магьрум хьана.
«Лезги газет»
