Серенжем давамарда

РФ-дин оборонадин министр С.Шойгуди къейд авурвал, Рагъ­акIидай пата Украинадиз гузвай куьмекризни, Россиядиз акси яз кардик кутазвай санкцийризни килиг тавуна, чи уьлкведи махсус серенжем кьиле тухун давамарда.

Адан гафаралди, дустагъда авайбур аххъаюнин ва агьалийрив яракьар вугунин нетижада Украинада еке тахсиркарвилер арадал атана. Граждан халкь яракьралди таъминаруникди гужар авунин ва ислягь халкьарин эменни тарашунин кьадар артух жезва. С.Шойгуди мадни къейд авурвал, Украинадин яракьлу къуватри женгера иштиракуникай кьил къакъудзавайбур гуьл­леламишзава. Идалайни гъейри, украинви аскерри ислягь агьа­лияр чан алай къалхандин еринда ишлемишуналди, абур шегьер­рай экъечIдай рехъ кIевзава; инсанар яшамиш жезвай магьалра танкар эцигзава.

Америкадин терефдикай рахадайла С.Шойгуди къейд авурвал, США-диз международный хатасузвилин архитектура михьиз чукIурунин къаст ава.

Хатасузвилин Советдин секретарь Н.Патрушева “АиФ” газетдиз гайи интервьюда малумарайвал, Украинада кьиле тухузвай махсус серенжем давам хьунин жигьетдай Россия са тайин муддатдихъ калтугзавач. Адан гафаралди, кьилинди, дувуларни кваз акъудна,  миллетбазвал терг авун я.

25-майдин экуьнахъ РФ-дин оборонадин министерстводи малумарай делилралди, махсус серенжем кьиле тухунив эге­чIайдалай инихъ Россиядин Яракьлу Къуватри Украинадин 178 самолет ва 126 вертолет, зенитный ракетайрин 322 комплекс, пилот галачиз лув гудай 1006 аппарат, 3258 танк ва дяведин ма­са машинар, РСЗО-дин 430 установка, артиллериядин ва маса 1671 яракь, дяведин суьрсет, военный махсус 3155 автомобиль тергна.

Катзавайбурун кьадар артух жезва

Военный махсус серенжем кьиле тухуз эгечIайдалай инихъ Украинадай 6,5 миллиондилай гзаф инсанар экъечIна. Хаталу чкайрай катзавай агьалийрин крарин рекьяй ООН-дин верховный комиссардин управленидал асаслу яз, идакай 24-майдиз  “ТАСС” чешмеди хабар гана. Къейд авурвал, эхиримжи суткада катайбурун умуми кьадар 56 агъзурдан артух хъхьана.

Маймунрин азар

Великобританияда 70-далай виниз инсанрик маймунрин  цIе­гьер (азар) акатнава. Идакай, а уьлкведин здравоохраненидин агентст­водин делилрал асаслу яз, “Новости” РИА-ди хабар гана.

Къейдзавайвал, хамуниз адетсуз жуьредин тварар акъатай ксар тади гьалда духтурдин кьилив фин герек я.

ВОЗ-ди раижнавай малуматралди, маймунрин азар “сих ала­къадин” нетижада садахъай масадахъ галукьзава. Инфекция акатнавайбурухъ галаз мукьувай алакъа хьайибур иллаки хаталу­вилик акатзава. Маймунрин азар ОАЭ-дин са агьалидикни акатнава.

Роспотребнадзорди хабар гайивал, Россияда и хаталу вирус — маймунрин цIе­гьер — инсанрик акатай дуьшуьшар авач.

Чугъундурдикай менфят ава

Духтур-эндокринолог, пегьризчи Н.Лазуренкоди “Москва-24” телеканалда малумарайвал, чугъундур тIуьни инсандин сагъламвилиз хийир гузва. Кьилди къачуртIа, и майвади нервийрин системадин кIвалах хъсанарзава.

Пешекардин фикирдалди, бетаин квайвиляй чугъундур мукьвал-мукьвал ишлемишун герек я. Адак C, В витаминарни ква.

Умудар буш хьанва

Берлинди Украинадиз яракьар ракъурунин гьерекатар яваш хьуникди Германияда авай Украинадин векил А.Мельникан пер ханва. Немсерин чешмейрал асаслу яз, идакай “Новости” РИА-ди хабар гана.

“Ракъурда лагьана хиве кьур 15 “Gepard” (зенитный установка)  анжах июлдин эхирра агакьардайвал я, мад 15 “Gepard” — августдин эхирра”, — наразивалзава украинвиди. Адан гафаралди, ФРГ-диз дяведин 100-лайни виниз машинар, танкар ракъурдай мумкинвал ава, амма энгелвилери умудар бушарзава.

ФРГ-ди Киевдиз яракьар ракъурунин карда кьетIивал къалурзавач лугьуз, Украинадин векилди идалай виликни са шумудра тахсир кутазвай жуьредин фикирар малумарнай.

Куьгьне жуьредин телефонар

Рекъемрин экономика еримлу авунин фондунин векил Г.Клименкоди “Sputnik” радиодин эфирда малумарайвал, Россияда кнопкайрин телефонар дебда гьат хъувун мумкин яз гьисабзава. И кар ада “Apple” ва “Android” платформайра россиявийрин смартфонар цIийи таххьунин хаталувал аваз хьунихъ галаз ала­къалу ийизва.

Ада алава хъувурвал, кнопкаяр алай телефонри яргъалди кIвалахзава, абурун аккумуляторди саки гьафтеда дурум гузва.

«Лезги газет»