КIеве гьатда
Украинадин экономикадин виликан министр В.Суслован фикирдалди, уьлкведа мукьвал гележегда залан кризис арадал къведа. Адан гафар “Главред” чешмеди раижнава.
Экономистди къейднавайвал, кризис сифте нубатда электроэнергетикадиз, чимивилелди таъминардай системадиз талукь жеда. “Алукьдай кьуьд лагьайтIа, Украина патал лап четинди жеда”, — лагьана Суслова.
Ада кризисдин месэла Евросоюздиз Россиядин алава газдин игьтияж аваз хьунихъ галаз алакъалу ийизва. Алава газдалди, Суслова гьисабзавайвал, “Северный поток-2” турбайрай таъминарун фикирдиз къачунва. Амма Европадивай газ маса къачуникай фикирзавай Украинадин гьукумдарриз къиметар хкаж хьуни зарар гуда.
Къейд ийин, “Северный поток-2” газопровод тухунин кIвалахар 10-сентябрдиз акьалтIнай, амма гьелелиг кардик кутунвач.
Ахтармишунар тIимиларда
Россиядин Президент Владимир Путина мектебра гуьзчивал тухунин ва ахтармишунин кIвалахрин кьадар тIимиларун тапшурмишнава. Идан гьакъиндай Кремлдин сайтда малумат раижнава.
Президентдин тапшуругъ Рособрнадзорди кьилиз акъудзава.
Кьушунар ахкъудна кIанзава
ООН-дин трибунадихъай рахай Сириядин МИД-дин кьил Ф.Микдада США-дизни Туьркиядиз республикада къанунсуздаказ авай яракьлу кьушунар ахкъудуниз эвер гана. Адан гафар “Новости” РИА-ди раижнава.
Ада, Сириядин Идлиб вилаятда террористрин тереф хуьзва, гьакIни Нур-Султандани Сочида кьиле фейи рахунрин нетижада хьайи икьрарар чIурзава лугьуз, Туьркиядик тахсир кутуна.
Ф.Микдадан фикирдалди, Идлиб “къецепатан террористрин кIеретIдиз” элкъвенва.
ВОЗ-дин истемишун
Россияда арадал гъанвай “Спутник V” вакцина тIугъвалдиз акси женгина ишлемишдай дарманрин сиягьдик кутун патал ВОЗ-ди адакай алава делилар тIалабнава. И хабар “ТАСС” чешмеди малумарнава.
Идалай вилик ВОЗ-дин векилрин десте мукьвал вахтара “Спутник V” тестикьарун патал мад сеферда Россиядиз атуникай малуматар раижнай.
Сагълам тIуьн
Канададин пегьризчийрин ассоциациядин векил Н.Нефедовади сагълам тIуьнин гьакъиндай теклифар гана.
“Nation News” чешмеди раижнавайвал, инсанрин арада машгьур хьанвай бязи пегьризрин жуьрейри фад яхун жез куьмек гузва, амма а къайдайри сагъламвилиз зарар гунни мумкин я. Ада къейд авурвал, инсандин беденди белокрилай гзаф углеводар кьабулун лазим я.
“Бязи инсанри рациондикай емишарни салан майваяр хкудзава ва идалди чеб витаминрикай магьрумзава”, — лагьана пешекарди. Ада сагъ тварарин суьрсетар ишлемишун теклифзава.
Кирида вугуда
Афгъанистандин меркездин гьукумдарри малумарнавайвал, уьлкведай катай агьалийрин кIвалер, анрик угъриярни тарашчияр акат тавурай лугьуз, кирида вугудайвал я. Идан гьакъиндай “Новости” РИА-ди хабар гузва.
Кабулдин регьберри районрин кьилериз, иесияр катна, ичIизвай кIвалерин сиягь туькIуьрунин тапшуругъ ганва.
Рекьерал цIийи камераяр
Москвада гзаф ванер акъудзавай улакьрин иесийриз жаза гун патал рекьерал тайинарнавай махсус камераяр синагъзава.
“Коммерсантъ” чешмедин делилралди, уьлкведин меркездин куьчейра микрофонар алай камераяр пайда хьанва. ЦIийи камерайри рекьерай физвай улакьрин ванцин гужлувал ахтармишда ва кьадарсуз ван-сес твазвай улакьрин сагьибриз жермеяр кхьида. Къейдзавайвал, алай вахтунда абур ахтармишунин, кардик кутунин серенжемар давам жезва.
Улакьрин департаментдин векил А.Корнееван гафаралди, цIийи камерайрал кьуд микрофон ала, идалайни гъейри, абуру шикилар ва видеояр чIугвада.
Алава хъийизвайвал, камерайри рекьерин хилерин арайрай мотоциклияр гьалзавайбурун гьерекатарни тайинарда.
Санкцияр давамарда
Гуя химиядин яракьар чукIуруниз ва раижуниз килигна, Евросоюзди Россиядиз акси санкцийрин муддат артухар хъийидайвал я. Идакай “Новости” РИА-ди хабар гузва.
Чешмедин делилралди, ЕС-дик квай уьлквейрин векилри и месэла комитетдин заседанидал 29-сентябрдиз веревирдна.
РикIел хкин, 2-мартдиз ЕС-ди Россиядин чIехи къуллугърал алай са жерге ксариз талукь яз санкцияр кардик кутунай. Сириядин мулкара гуя химиядин яракьрин куьмекдалди гьужумар кьилиз акъуднава лугьуз, алай вахтунда ЕС-ди Россиядин вад ватандаш санкцийрик кутунва.
«Лезги газет»
