РД-дин МФЦ-дин кьилин идаради хабар гайивал, 14 йис тамам хьайила ватандашриз гузвай сад лагьай паспорт гила и идарайрай къачуз жеда. “Мои докумен­ты”­ центрадиз 14 йис тамам хьайидалай кьулухъ 90 йи­къан къене арза вугуз жеда. Эгер 14 йис жез са югъ амаз хьайи­тIани, талукь яшдив агакь тавунмаз, арза вугуз же­дач.

14 йис тамам хьайила, МФЦ-дай паспорт къачун патал ихьтин документар герек я:

—        диде-бубайрин паспортар (абурукай сад галаз хьун чарасуз я);

—        дидедиз хьайивилин гьакъиндай шагьадатнама (ламинировать тавунвай);

—        шикил;

—        300 манат госпошлина (ам МФЦ-да гуз жеда);

—        кIвалин ктаб (домовая книга), форма 3, форма 8 (ибурукай са документ).

Эгер дидедиз хьайивилин гьакъиндай шагьадатнама ламинировать авунватIа, ам МФЦ-да цIийи кьиле­лай вахчуна кIан жеда.

Къейд ийин, винидихъ  вичикай раханвай арза Госкъуллугърин порталдай вугудай мумкинвал авач.

Мектебриз физвай аялриз

Алатай йисара хьиз, Дагъустанда яшамиш жезвай­ гзаф аялар ва игьтияж авай хизанрай мектебдин                  1-класс­­диз физвай аялриз, гьукуматдин патай куьмек яз, 2 агъзур манат пул цIини гузва.

И такьатарни агьалийривай чпиз къулай тир МФЦ-дин идарадин куьмекдалди къачуз жеда. Къейдзавайвал, пособие къачун патал герек тир документар алай йисан 1-июлдилай 1-декабрдалди кьабулзава. Герек чарар-цIарар МФЦ-дин пешекарривай чириз жеда.

«Лезги газет»