Квез чидани?

.  Улан-Удэ Буря­тиядин меркез я. Анин умуми майдан 347 квад­ратный  километр­ди­­­кай ибарат я. Шегьерда 436 агъзурдалай гзаф агьалияр яша­миш ­жезва.

.  Улан-Удэ Рагъ­экъечIдай патан Сибирдин лап къадим ше­­гьеррикай сад я.

.  2018-йисуз Улан­Удэ ва санлай Бурятия республика Дальневосточный­ федеральный округдик кутуна, амма­ географиядин жигьетдай и мулкар Рагъ­экъечIдай патан Сибирда экIя хьанва.

.  Инсанрин кьадардал гьалтайла, Улан-Удэ ДФО-да пуд лагьай чкадал ала. Сад ва кьвед лагьай чкайрал Хабаровск ва Владивосток ала.

.  Багамар, Мальдивар, Исландия хьтин уьлквейрилай Улан-Удэ шегьерда гзаф агьалияр яшамиш жезва.

.  И шегьердин бине 1666-йисуз кутуна. Адал сифтедай «Удинское зи­мовье» тIвар алай. И тIвар Уда вацIухъ галаз алакъалу я.

.  Шегьердал 1934-йисалай Улан-Удэ тIвар ала. Виликдай аниз (1775-1783-йисара) Удинск, гуьгъуьнлай (1783-1934-йисара)  Верхнеудинск лугьузвай.

.  Чкадин халкьарикай анжах пудан са пай бурятар я.

.  Агьалияр жуьреба-жуьре миллет­рикай, гьар жуьредин динриз ибадат ийиз­вайбурукай тирвиляй Улан-Удэда мис­кIинар, килисаяр ва маса динриз талукь ибадатханаяр гзаф ава.

.  Шегьерда бурят ва урус чIалар кьилинбур яз гьисабзава.

.  Гьавадин шартIарикай рахайтIа, и шегьерда январдиз юкьван гьисабдалди -23 градус мекьи, гатуз +20 чими жеда.  Гатун бязи вахтара зегьемвал +40 градусдив агакьда, хъуьтIуьн бязи вахтара мекьивал  –  -54 градусдив.

.  Элкъвена дагълари кьунвайвиляй Улан-Удэда гарар саки жезвач.

.  И шегьер килигуниз лайихлу чкайралди девлетлу я. Забайкальедин халкьарин Этнографиядин музей Россиядин мулкара авай цавун кIаник квай гегьенш музейрикай сад я.

.  И шегьерда тарихдин дараматар са акьван амач. Гьавиляй 2010-йисуз Улан-Удэ Россиядин тарихдин шегьеррин сиягьдикай хкуднай. Акьван чIавалди 20 йисан муддатда (1990-2010-йисара) и шегьер а сиягьда хьана.

.  Шегьерда медениятдин ирсинин дережа ганвай 234 объект ава. Абур вири государстводин къаюмвилик ква.

«Лезги газет»