МФЦ-дин идарайра водителвилин правояр дегишардай мумкинвал ава. Адет яз, водителвилин шагьадатнама ишлемишунин вахт акьалтIайла, документдиз зарар хьайила ва я квахьайла дегишарзава. Себебар жуьреба-жуьребур хьун мумкин я.
Водителвилин шагьадатнама МФЦ-дин идарада дегишардайла, агьалидив и документар гваз хьун герек я:
— куьгьне правояр (амаз хьайитIа);
— паспорт;
— медицинадин справка.
Ибурулайни гъейри, водителвилин шагьадатнама гун патал 2 агъзур манатдин кьадарда аваз госпошлина гун герек я.
РД-дин МФЦ-дин кьилин идаради малумарайвал, и къуллугъ 15 йикъан муддатда кьилиз акъудда.
Кьвед лагьай сеферда вахчудайла…
Хайивилин гьакъиндай шагьадатнама кьвед лагьай сеферда вахчуна кIандай дуьшуьшарни жезва. Эгер и документ квахьнаваз ва я чIур хьанваз хьайитIа, ам мад сеферда вахчун патал МФЦ-дин идарадиз фин бес жеда. Къейд ийин, ламинироватна “хвенвай” шагьадатнамаяр, бязи къуллугъар кьилиз акъуддайла, МФЦ-дин идаради кьабулзавач. Пешекарди тестикьарзавайвал, гележегда ихьтин документар ламинировать авунал къадагъа эцигда.
Хайивилин гьакъиндай шагьадатнама вахчуз кIанзавай касдив вичин паспорт гваз хьун бес я (аваз хьайитIа, куьгьне шагьадатнамадин копияни). И документ хгун патал ватандашди 350 манатдин госпошлина гана кIан жеда.
«Лезги газет»
