“Лезги газетдиз” РД-дин зегьметдин ва яшайишдин рекьяй вилик финин министерстводин пресс-къуллугъди хабар гайивал, республикадин са жерге шегьеррани районра государстводи 3-7 йисарин яшара авай аялриз тайинарнавай пул вахтунда гуз хьанвач. И кар пулдин такьатар бес тахьунихъ галаз алакъалу я.
Идаради РФ-дин зегьметдин ва яшайишдин рекьяй хуьнин министерстводиз пулдин алава такьатар чара авун патал чар рекье тунва. Октябрдин сад лагьай паюна 3-7 йисарин яшарин аялар авай хизанриз пулдин такьатар гун давам жеда.
КIваляй экъечI тавуна
Республикадин зегьметдин ва яшайишдин рекьяй вилик финин министерстводи мобильный “СоцЗащита” приложение кардик кутунва. Адан куьмекдалди дагъустанвийривай, кIваляй экъечI тавуна, агьалияр яшайишдин рекьяй хуьдай идарайрин къуллугърикай менфят къачуз жеда.
“soc.dagmintrud.ru” портални агьалийривай яшайишдин идарайри ийизвай къуллугърикай электронный къайдада менфят къачуз хьун патал арадал гъанва. Ахьтин къуллугърин кьадар 50-дав агакьзава. Порталдин куьмекдалди республикадин гьар са агьалидивай яшайишдин рекьяй куьмек гунин серенжемрикай гегьенш малуматар чириз, тайин са къуллугъдикай менфят къачун патал арза вугуз, герек тир идарада нубат кьаз жеда.
Порталдикай, мобильный приложенидикай хийир къачун патал “Госуслуги” порталдин логин ва пароль ишлемишда.
«Лезги газет»
