Накь, Махачкъалада, “Дагъустан” РИА-дин конференц-залда, алай йисан 8 ва 9-июлдиз Каспийскда, Али Алиеван тIварунихъ галай Спортдин дворецда, азаддаказ кьуршахар кьунай СССР-дин 9 сеферда, Европадин ва дуьньядин 5 сеферда чемпион, Советрин Союздин спортдин лайихлу мастер Али Алиеван международный 48-турнир кьиле тухуниз талукьарнавай пресс-конференция кьиле фена. Анал РД-дин физический культурадин ва спортдин рекьяй министрдин заместитель, Олимпиададин чемпион Гьайдарбег Гьайдарбегова, азаддаказ кьуршахар кьунай Дагъустандин хкянавай командадин старший тренер Гьайдар Гьайдарова ва Италиядин хкянавай командадин векил, Олимпиададин къугъунрин буьруьнждин призёр, дуьньядин чемпион, Европадин кьве сеферда чемпион Франк Чамизоди иштиракна.

Мугьманрин рахунрай малум хьайивал, 48-турнирда иштиракун патал дуьньядин 14 уьлкведай тир 120-далай виниз спортсменри заланвилин 8 категориядай гьасиррал чпин алакьунар къалурда, сифтедай лагьайтIа цIи и турнирда дуьньядин 5 уьлкведай тир спортсменри иштиракун гуьзлемишзавай. И турнирда 1-чка кьур спортсменриз, гьа виликдай хьиз, 150 агъзур манат гуда. Россиядин ва Дагъустандин виридалайни викIегь спортсменриз и турнирда иштиракдай мумкинвал авач, абуру Польшада кьиле фидай дуьньядин чемпионатдиз гьазурвал аквазва. Гь.Гьайдарова къейд авурвал, им жегьил спортсменриз гегьенш майдан ачух жезва лагьай чIал я.
Пресс-конференциядин иштиракчийри Италиядай атанвай мугьман Ф.Чамизодиз гзаф суалар гана. Таржумачидин куьмекдалди гайи жавабрай чир хьайивал, ам чи республикадиз атана саки 3 гьафте я. Ада вичиз Дагъустан гзаф бегенмиш хьанвайди, чи республикада мугьманда хьун ва и турнирда иштиракун вич патал гзаф важиблу тирди, А.Алиеван мемориалда-кесерлу акъажунра — гъалибвал къазанмишуник умуд кутунвайди къейдна.
Турнирдин тешкилатчийри спортдин и жуьредал рикI алай вири ксариз акъажунриз тамашиз атун теклифна. Акъажунриз пулсуз килигиз жеда.