Кьурагь райондин сайтда хабар ганвайвал, са тIимил йикъар идалай вилик Кьурагьа чIемерукрай лишанар ягъунай республикадин турнир кьиле фена. Ана Кьиблепатан Дагъустандин ва республикадин амай районрайни атанвай 100-далай виниз спортсменри чпин устадвал къалурна.

Турнир ачухуниз талукьарнавай шад мярекатда Кьиблепатан Дагъустанда РД-дин Муфтиятдин патай тамам ихтиярар ганвай векил Магьди Абидова, Кьурагь райондин имам Шамил Омарова, райадминистрациядин общественный хатасузвилин рекьяй заместитель Альберт Исаева, райондин физический культурадин, спортдин ва жегьилрин крарин рекьяй отделдин начальник Рамиз Рамазанова ва масабуру иштиракна. Анал Магьди Абидова, турнирдин иштиракчийрихъ ва мугьманрихъ элкъвена, сагълам уьмуьр кьиле тухунин важиблувиликай, жегьилвал нагьакьан крар ийиз пуч тавуникай суьгьбетарна. Анал рахай амай ксарини жегьилрихъ агалкьунар хьана кIанивилин келимаяр лагьана, Р.Рамазанова райондин кьиле авай ксарин тIварунихъ мугьманриз республикадин акъажунар кьиле тухуз активнидаказ куьмек гунай чухсагъул малумарна.
Турнирда Хив райондай тир Фарид Абдурагьманов 1-чкадиз лайихлу хьана. Кьурагь райондай тир Эльмар Бабаева ва Нуруддин Абдулмажидова 2-чкаяр кьуна.