24-июндиз Туьркиядин Стамбулда кьиле фейи «Яшар догу» турнирда чи республикадай тир са шумуд спортсмендини кIвенкIвечи чкаяр кьуна. ИкI, абурун арадай тир Румыниядин патай экъечIзавай чи ватанэгьли Якьуб Шихжамалова (74 кг-дин заланвал авайбурун арада) къизилдин медаль къазанмишна.
РикIел хкин: Я.Шихжамалова Махачкъалада, Гь.Гьамидован тIварунихъ галай спортшколада, вичин устадвал хкажна. Ам уьлкведин кIвенкIвечивал патал акъажунрин призер, Европадин миллетрин Кубокдин сагьиб, международный турниррин гъалибчи я.
ИкI, Египетда кьиле фейи международный «Ибрагьим Мустафа» турнирда Я.Шихжамалова къизилдин медаль къазанмишнай. Ам 4 сеферда гьасиррал экъечIнай: Къазахстандай (7:2), Бахрейндай (4:0), Египетдай (10:0) ва Туьркиядай (4:3 гьисабралди) тир спортсменар, финалда лагьайтIа, Олимпиададин къугъунрин призер Сонер Демирташ адаз кумукьнай.
2021-йисан июлдилай Я.Шихжамалов Румыниядин патай гьасиррал экъечIзава.
Р.Рамалданова
