Эхиримжи вахтара Ахцегь райондин муниципалитетдин администрацияди РД-дин кар алай “Нетижалу АПК” проект уьмуьрдиз куьчуьрмишунин рекье кьилдин инвес–торар желб авун патал гзаф кIвалахар ийизва.
ИкI, мисал яз, райондин кьил Осман Абдулкеримован теклифдалди винидихъ вичикай лагьанвай месэла кьилиз акъудунал карчи Жигерхан Сулейманов машгъул хьанва. Вичин хсуси такьатрихъ ада жегьилрин машгъулатардай “Самур” центрадин патав малар тукIвадай ва як гьялдай комбинат эцигзава.
Алай вахтунда 853 кв.метрдин майданда ООЛМК (як гьялдай комбинат) эцигунин кIвалахар тамам жезва. Проектдин бинедаллаз, комбинатдихъ суткада 10 къарамалдин ва 30 лапагдин як гьазурдай гужлувал жеда. Ина 20 касдиз кIвалахдин чкаяр тешкилдайвал я. Проектдин сметада къалурнавай къимет 50 миллион манатдиз барабар я. И такьатар асул производстводин объектар, гьакIни куьмекдин дараматар эцигуниз, як муркIада твадай ва маса тадаракар тайинаруниз харжда. Як муркIада твадай камерада 100 тонн продукт хуьз жеда. Комбинатдин къуллугъчияр тир Расим Демиров ва Жаватхан Сулейманов алай вахтунда чи уьлкведа акъуднавай алай аямдин тадаракар лазим чкайрал тайинарунал машгъул я. Комбинатди гьазурдай продукт — “дагъдин як” — къайи авунваз ва муркIада тунваз республикадин алишверишдин сетрик акатзавай туьквенрай маса гудайвал я. ЦIийи карханади райондин малдарвилин хел вилик тухуз куьмек гуник умуд кутунва.