Эхиримжи вахтара Ахцегь районда, республикадин кар алай “Нетижалу АПК” проектдин сергьятра аваз, теплицайрин майишатрин кьадар артухарунин месэладиз кьетIен фикир гуз башламишнава. И хел вилик тухуник гьерекат ам хийирлуди, виле акьадай къазанжияр гъидайди хьуни кутазва. Идалайни гъейри, уьлкведа уьмуьрдиз куьчуьрмишзавай къецепатан государствойрай гъизвай суьрсет ватанда гьасилзавайдалди эвезунин программади хъсан нетижайрив агакьариз куьмек гузва. ИкI, “ЮГАГРО” СПК-дин теплицайрин майишатдихъ (Н.К.Мирзоева ам 1000 кв.метрдин майдандал тешкилнава) галаз санал ина, “Дербент-Рутул” шегьредин къерехда авай жегьилрин “Самур” комплексдин патав, теплицайрин мад са цIийи майишат пайда хьанва.
Карчи П.Сулеймановади ина, Италиядин тадаракар ва агропромышленныфй хилен алай аямдин технологияр ишлемишна, 1500 кв. метрдин майдандал виниз тир бегьерар гудай жегьре рангунин помидорар гьасилиз саки йис жезва. Проект уьмуьрдиз куьчуьрмишун патал бюджетдилай къерехдай тир 12 миллион манат серфнава. Гьелелиг майишатда 8 касди кIвалахзава.
Майишат гегьеншарун патал къерехда 300 кв. метрдин майданда лимонарий эцигунин кIвалахар тамамарна куьтягьзава. Алай вахтунда ина накьв гьазурзава, тадаракар кардик кутазва, къелемар маса къачузва. Ида кIвалахдин алава чкаяр тешкилдай ва йисан кьиляй-кьилиз экологиядин жигьетдай михьи суьрсет гьасилдай мумкинвал гузва.
РикIел хкин, гьеле алатай асирдин 70-90-йисара Ахцегь райондин хуьруьн майишатдин тежрибадин станциядал, Дагъустанда сифте сефер яз, 1300 кв.метрдин майдан кьунвай теплица-лимонарий туькIуьрнай. И кардик кьил кутурди хуьруьн майишатдин илимрин кандидат Алимегьамед Букаров тир. Къейд ийин, теплица гугурт квай цин кузвай чешмейри чими ийизвай.
Майишатди гьар йисуз виниз тир еридин лимонрин 1000 килограммдив агакьна бегьер къачузвай. Ам лагьайтIа, неинки районда, гьакI адалай къерехдани нетижалудаказ маса гузвай.
ГьикI хьайитIани, вири чпин чкайрал хкведа лугьуда. Аквар гьаларай, Ахцегьрин яржни гуьнгуьна гьат хъийизва.

Дашдемир Шерифалиев