Зегьметдин книжка работникдин зегьметдин агалкьунар ва стаж къалурзавай кьилин документ я. Ана кIвалахзавай касдиз, ада кьилиз акъудзавай кIвалахдиз, ам вахтунин сергьятар эциг тийизвай маса кIвалахдал эцигуниз, ам кIвалахдилай алудуниз, зегьметда къазанмишнавай лайихлувилерай адаз наградаяр гуниз талукь яз делилар къалурзава.

Алай вахтунда зегьметдин электронный жуьредин книжкаяр кардик кутуниз талукь месэладиз килигзава. Махсус делилрин база  арадал гъида, анай агьалийрин зегьметдин рекьихъ галаз алакъалу малуматар гьатда.

Электронный жуьреди са шумуд месэла, тайиндаказ лагьайтIа, зегьметдин книжкаяр учётда эцигунин ва абур хуьнин къайдайрал амал тавунай работодателдин хивяй жавабдарвал  акъатунин, делопроизводство тухунин харжияр ва штат тIимиларунин, кIва­лах жагъурзавай касдин зегьметдикай малу­матар фад жагъурдай мумкинвал гунин месэлаяр гьялиз куьмекда.

Работник патал виридалайни кьилин кар ам я хьи, зегьметдин электронный книжкаяр кардик акатуникди чIуру делилар кхьиниз рехъ гудай мумкинвал амукьдач. Кьилди къа-чуртIа, зегьметдин шартIар, къуллугъар, мажибар дегиш хьуниз талукь къейдер абурал къулар чIугур вахтунилай къуватда гьатда, и карди лагьайтIа, намусдиз михьи тушир регьберриз делилар “гуьгъуьнлай, са вахт алатайдалай кьулухъ” туькIуьр хъийидай мумкинвал гудач. Работник патал хъсан кар мадни ам жеда хьи, адаз вичин зегьметдин стаждиз талукь делилрик вичи вахтуналди яз гьисабзавай къуллугъ раиждай малумат кутан тийидай мумкинвал ава, и кар патал ам кIвалахал контрактдин бинедаллаз акъва­зун лазим я. Ихьтин вахтунда кьве патан ала­къаярни контрактдин бинедаллаз кIвалахал акъвазунин жуьреда къайдадик кутада.

РФ-дин зегьметдин ва яшайишдин рекьяй­ хуьдай министерстводин векилри къейдзавайвал, электронный книжкайрал эля­чIу­нин кIва­лах пландин бинедаллаз ва тади къа­чун таву­на кьилиз акъудда. Сифте нубатда, цIийи къурулушдиз талукь месэлайрин гъавурда твазвай законар туькIуьрун ва кьабу­лун­ лазим я. Гуьгъуьнлайни электронный мах­сус та­дара­кар маса къачун, герек тир программаяр туь­кIуьрун ва къайдадик кутун герек я.

РикIел хкин. Зегьметдин книжкадин “хайи югъ” 1938-йисан 20-декабрь яз гьисабзава. И юкъуз гьукуматди “Зегьметдин книжкаяр ишлемишунин къайдадин гьакъиндай” къарар кьабулнай. Ам а чIавуз тестикьарай кIалубда аваз 35 йисуз ишлемишнай. 1973-йи­­сан сентябрдиз Министррин Советди “Зегьметдин книжкайрин ва къуллугъчийрин гьа­къин­дай” цIийи къарар кьабулнай. Ана зегьметдин книжка гражданинрин кIвалахдин рехъ къалурзавай кьилин документ тирди тес­ти­кьарнай. Абурни общественный тешкилатрин векилрин ва вири коллективдин иштираквал аваз  шад гьалара вахкун буйругънавай.

И кIалубда аваз зегьметдин книжка 30 йи­суз амукьна. РФ-дин гьукуматдин 2003-йисан 16-апрелдин 225-нумрадин къарардалди цIийи жуьрединбур 2004-йисан 1-январдилай ишлемишиз эгечIна. Зегьметдин куьгьне жуьредин книжкаярни къуватдай вегьенвач. ЦIийи жуьредин книжкаяр виликанбурулай са акьван дегиш хьаначир. СССР-дин герб РФ-дин гербдалди эвезна. Виликдай авай 40 чинин чкадал зегьметдин книжкада 4 чин  артухарна. Абур туькIуьрдайла, къалпвиликай хуьдай серенжемриз артух фикир ганва. Абурун жергеда ультрафиолетдин ну­рарал экв гузвай “Трудовая книжка” гафар кхьенва. Документдин чарар махсус цвалдалди кутIуннава, ида чарар дегишаруникай хуьзва.

Чи мухбир