И мукьвара Кьурагь райондин администрациядин информациядин технологийрин ва печатдин центрадин векилар целди таъминардай цIийи линия туькIуьрзавай гьалдихъ галаз таниш хьун патал Маллакент хуьруьз мугьман хьана, хабар гузва райондин пресс-къуллугъди.
Администрациядин дараматда абур хуьруьн кьилин заместитель Нурагьмед Хаметовахъ, кьилин бухгалтер Мирземегьамед Сефихановахъ ва школадин директор Фикрет Ибрагьимовахъ галаз гуьруьшмиш хьана. Малум хьайивал, хуьре яд авачиз кьуд лагьай югъ тир. Ина агьалийрин митингар кьиле фенвай.
Администрациядин кьил Минетуллагь Алиев гьеле пакамалай цин месэла гьялунал машгъул тир. Ада хабар гайивал, ам рабочийрин бригадани галаз “Самур-Хазар” водоводдин патав фенвай. “Зур сятдилай хуьруьн турбайриз яд хкведа. Чун кьве гьафтедин вахтунда яд куьгьне турбадай агакь хъувун давамарунин гьакъиндай икьарар хьанва ва турбаяр куьгьне системадик галкIурна куьтягьнава”, — лагьана М.Алиева.
Гуьгъуьнлай администрациядин векилар цIийи линия туькIуьрзавай чкадал фена. Къейд ийин, проектдин пудратчи карчи Мусаиб Абдуселимов я.
Ина 3 километрдин мензилда чил 1,5 метрдин деринвал аваз эгъуьннава ва цIийи турба тухун патал гьазурвилер акунва.
“Турбаяр чав и йикъара агакьда. Эгер вири кIвалахар планда къалурнавайвал кьиле фейитIа, цIийи линия чна 2 гьафтедин вахтунда тухвана куьтягьда”, — лагьана М.Алиева.
Чи мухбир
