7-августдиз Сулейман-Стальский райондин кьил Н.Абдулмуталибов райадминистрациядин жавабдар къуллугъчийрихъ галаз санал «Алай аямдин шегьердин шартIар арадал гъун» программадай ЦIийи Макьарин хуьре ял ядай багъ аваданламишунин кIвалахар кьиле физвай чкадал фена. Идакай «Лезги газетдиз» райадминистрациядин пресс-къуллугъди хабар гузва.

Хъсандиз туькIуьрун патал кIвалахар кьиле физвай ял ядай багъдин майдан, санлай къачурла, 2830 квадратдин метрдикай ибарат я, икьрардин къимет лагьайтIа, — 4 275 660 манатдикай.

Паркунин мулкара «Хажалат чIугвазвай диде» гуьмбетни эцигда. Скульптура арадал гъанвайди лезгийрин машгьур художник Шариф Шагьмарданов я. Мемориальный комплексдал  Ватандин ЧIехи дяведа кечмиш хьайи хуьруьнвийрин тIварар жеда.

Чешмеди кхьизвайвал, гуьмбетдин къаршида авай гъвечIи майдан тадаракламишун патал чкадин бюджетдин ва меценатрин такьатарни желбдайвал я.  Алай вахтунда чил къайдадик кутунин кIвалахар кьиле физва.

Райондин кьили жавабдар ксарал гьар юкъуз кьиле физвай кIвалахрин гьакъиндай шикилрин гьахъ-гьисаб гун тапшурмишна.

«Лезги газет»