Дагъустан Республикадин Гьукуматдин Председатель Артем Здунован регьбервилик кваз республикада “Яшайишдин кIвалер ва шегьердин шартIар” милли проект уьмуьрдиз кечирмишзавай гьал веревирдна. Кьилин доклад РД-дин эцигунрин ва ЖКХ-дин министр Малик Баглиева авуна. Идан гьакъиндай “Лезги газетдиз” РД-дин Кьилин ва Гьукуматдин администрациядин пресс-къуллугъди хабар гана.
Заседанидал малумарайвал, “Яшайишдин кIвалер ва шегьердин шартIар” милли проект уьмуьрдиз кечирмишун патал Дагъустандин территорияда “Шегьердин къулай шартIар”, “Яшайишдин кIвалер”, “РД-да авай яшамиш жедай шартIар авачир кIвалерин фонд дурумлудаказ тIимиларун таъминарун” региональный проектрин паспортар тестикьарнава. И паспортар “Электронный бюджет” системада тайинарнава. Къейд авун лазим я хьи, “Шегьердин къулай шартIар” проектди кар алай месэлаяр гьялдайла агьалийрин патайни иштираквалдай мумкинвилер яратмишзава. Гъиле авай йисуз республикадин 10 шегьерда ва 58 хуьре общественный территорияр, гьаятар аваданламишун пландик кутунва. “Электронный бюджетда” талукь тир икьрарар проектдин вири иштиракчийрихъ галаз кутIуннава ва герек къвезвай кьадар такьатарни муниципальный тешкилатриз рекье тунва.
И крар кьилиз акъудун ва пудратдин организацияр тайинарун патал конкурсар кьиле тухудай 145 лот кардик кутадайвал я. Къенин йикъалди 99 лотдай конкурсар кьиле тухванва ва икьрарар кутIуннава. Амай 46 лотдиз талукь яз герек серенжемар августдин эхирралди тухуда. Ибуруз талукь кIвалахар документар туькIуьрунихъ галаз алакъалу яз кьулухъ яна.
Артем Здунова министр Малик Баглиевавай амай лотриз талукь кIвалахар куьтягьун патал мумкинвилер авани лагьана хабар кьурла, министрди “ава” лагьана жаваб гана. Гьа са вахтунда РД-дин Гьукуматдин Председателди документар туькIуьрзавай чиновникрихъ галаз семинар кьиле тухун теклифна.
РД-дин Гьукуматдин Председателдин заместитель Владимир Лемешкоди кьилиз акъудзавай кIвалахрин еридикай ихтилат кудна.
— И мукьвара Каспийск шегьердин гьуьлуьн къерехда алатай йисан объект ишлемишиз вахкана. Зун анал фенвай. Килигайла, акуна хьи, эцигунардайбуру чпин кIвалах гьакъисагъвилелди тамамарнавач. Са-са чкайрилай плиткаяр ацукьнавай. Гьа са вахтунда объектдин патав гвай дараматрин вилик квай чкайра виниз тир еридивди плиткаяр тунвай, — лагьана В.Лемешкоди.
Идаз талукь яз Артем Здунова тагькимарна: “Пудратчийри, абурувай гьикI истемишайтIа, гьакI кIвалахни ийида. Эгер абурувай истемиш тавуртIа, абуру ерисуздаказ кIвалахунни давамарда. ДатIана абурун кIвалахдал гуьзчивал ийиз хьайитIа, истемишиз хьайитIа, нетижа масад жеда. Ерисуздаказ авунвай кIвалахдай пул гумир. Анжах вири нукьсанар туькIуьр хъувурла, ахпа. Эхирдай чун вири объектрал фида ва проектар кьилиз акъудунин карда иштиракзавайбуруз, кIвалахдиз килигна, къиметни гуда”.
РД-дин Кьилин ва Гьукуматдин Администрациядин руководитель Владимир Иванова алава хъувуна хьи, “Шегьердин къулай шартIар” “Сад тир Россия” партиядин федеральный проект я ва чпин вилик эцигнавай везифаяр кьилиз акъудиз тежезвай муниципальный тешкилатрин кьилерин гьакъиндай герек веревирдерни ийида.
Ахпа заседанидал рахай РД-дин Счетный палатадин председатель Билал Жахбарова къейдна хьи, РД-дин Кьил Владимир Васильеван теклифдалди, ведомстводи региональный проектар уьмуьрдиз кечирмишдайла харж ийизвай такьатриз, тамамарзавай кIвалахрин къиметриз талукьарнавай семинар-совещание кьиле тухвана. И мярекатда республикадин УФАС-дин казначействодин, госзакупкайрин рекьяй комитетдин, муниципальный районрин ва шегьеррин администрацийрин, талукь министерствойрин ва ведомствойрин векилри иштиракна. Б.Жахбарова, гьайиф чIугунивди лагьана хьи, муниципальный бязи тешкилатри совещанидиз и хилерихъ галаз алакъа авачир работникар рекье туна.
КIватI хьанвайбуруз Малик Баглиева 2019-2024-йисара агьалияр аварийный фондуник акатзавай яшайишдин кIвалерай (2017-йисан 1-январдин делилралди, 3394 квадратный метр, анра 262 кас яшамиш жезва) цIийи кIвалериз ахкъудуникай малумат гана. Ада “Яшайишдин кIвалер” региональный проект уьмуьрдиз кечирмишзавай гьалдикайни ихтилатна.
“2019-йисуз ишлемишиз вахкузвай яшайишдин кIвалерин кьадар 740 агъзур квадратный метрдиз барабар жеда. Алай йисан 1-июлдин делилралди, цIийи кIвалер эцигунин кIвалах 41 процентдин кьилиз акъуднава”.
Министрди къейд авурвал, санлай къачурла, Дагъустанда ишлемишиз вахкузвай 50 процентдилай виниз яшайишдин кIвалер Махачкъала шегьердал ацалтзава. 2018-йисан нетижайрив гекъигайла, кIвалер эцигунин еришар са тIимил энгел хьанва. Имни эцигунрин хиле тунвай цIийи къайдайрихъ галаз алакъалу я. Совещанидал авур докладриз къимет гуналди, Артем Здунова месэлаяр кар алайбур ва жавабдарбур тирди къейдна ва абуруз талукь яз мукьвара кьилдин совещание тухудайдакай малумарна.
— Яшайишдин кIвалер эцигзавай са кьадар карчияр нарази тирдакайни заз хабар ава, — лагьана А.Здунова. — Махачкъала шегьердин мэриядин векиларни галаз чна вири месэлаяр чирун, ахтармишун лазим я, гьикI лагьайтIа и месэлаяр шегьердин администрациядиз талукьбур я.
«Лезги газет»
