“Лезги газетдиз” Сулейман-Стальский райондин администрациядин пресс-къуллугъди хабар гайивал, мукьвара Дагъустандин ктабрин чапханада лезгийрин шаир, публицист, алим Азиз Мирзебегован “ЧIехи шаир ва арифдар” тIвар алай ктаб акъатнава.
Ам Дагъларин уьлкведин машгьур алим Алкьвадар Гьасан эфендидин уьмуьрдин ва яратмишунрин рекьиз бахшнава. Гьакъикъи делилрикай бине кьуна, арадал гъанвай ктаб арифдар дидедиз хьайидалай инихъ 185 йис тамам хьунихъ галаз алакъалу яз гьазурнава. Лагьана кIанда, Азиз Мирзебегован нубатдин кIвалахда философдин яратмишунрин кIвалахдин вири терефрикай раханва.
Ктабдин кьилдин са пай Алкьвадар Гьасан эфендидин сейли “Ассари Дагъистан” кIвалахдиз талукьарнава. Къейд ийин хьи, и чешмеда жуьреба-жуьре кIвалахрин бинедаллаз сифте яз, арабри гьужумар авур девиррилай гатIунна, XIX асирдин эхирдалди Дагъустандин тарих ачухарнава. ГьакIни Мирзебегован ктабда Алкьвадар Гьасан эфендидин яратмишунриз маса алимри, литературоведри ганвай къиметдикайни раханва. Философдин шииррин таржумайри ва “Экинчи” (“Цан цадайди”) газетдин чинриз акъатай макъалайри ктабда кьетIен чка кьунва.
Идалай гъейри, Азиз Мирзебегова тIвар-ван авай шаир, арифдар, философ Низами Гянжевидин лезги чIалал “Мидаим багъ. Хкягъай эсерар” тIвар алай ктабни ахкъуд хъувунва. Ана шаирдин лирикадин эсерар ва поэмайрай бязи чIуквар санал кIватIнава. Лагьана кIанда, таржумачидилай лезги чIалаз элкъуьрнавай яратмишунра Низами Гянжевидин чIаларин эфзелвал, гьиссер, кьатIунар ва шаир авай гьал хуьз алакьнава.
Чи мухбир
