Дагъустанда здравоохраненидин хейлин йисара акъваз хьайи объектрин эцигунрал чан хкиз гатIуннава. Кьилди къачуртIа, Избербаш шегьерда 20 йис идалай вилик эцигиз гъиле кьур больницадин дараматдал кIвалах ргазва. Аниз республикадин бюджетдай 100 миллион манат пул чара авунва. И такьатрихъ 300- далай гзаф койкаяр авай стационар эцигдайвал я. Амма идалди кIвалахар куьтягь жедач. Больница тамамдиз эцигна акьалтIарун патал къведай йисузни алава пулдин такьатар чара ийида.
“Шегьердин администрациядин куьмекдалди Избербашдин ва адан патарив гвай хуьрерин, поселокрин агьалийрив медицинадин рекьяй менфятлу куьмек агакьун патал алай аямдин вири истемишунриз жаваб гузвай больница арадал гъида. И карда чаз РД-дин Кьил Владимир Васильевани куьмек гузва”, — лугьузва Дагъустандин здравоохраненидин министр Жамалудин Гьажиибрагьимова.
Алай вахтунда Избербаш шегьердин кьилин больницада ремонтдин кIвалахар кьиле тухванватIани, анин кьилин духтур Ибрагьим Муслимован гафаралди, дарамат авай гьал са акьван хъсанди туш. Ам алатай асирдин эвел кьилера эцигнавайди я.
“Чкадин агьалийри цIийи больница эцигна акьалтIарун вилив хуьзва. Ам шегьерэгьлияр патал вижевай савкьат жеда”, — лугьузва И.Муслимова.
«Лезги газет»
