Дагъустандин здравоохраненидин министерстводин пресс-къуллугъди “Лезги газетдиз” хабар гайивал, и йикъара чи республикадиз коронавирусдиз акси рапар ягъун патал цIийи партия “Спутник V” маркадин “Гам Ковид-Вак” — 51 200, “Спутник Лайт” 40 808 раб (доза) агакьнава. РикIел хкин: “Спутник Лайт” вакцина яшар 60-далай алатнавай ксариз ядай ихтияр ганва. Ам кьвед лагьай сеферда вакцина язавайбур ва авай иммунитет мягькемар хъувун патал ишлемишзава.
Федеральный сад тир регистрдин малуматдалди, 27-августдиз авай делилралди, Дагъустанда коронавирусдин тIугъвалдиз акси рапар 363 253 касдиз, абурукай 260 826 касдиз рапар кьвед лагьай сеферда янава. Ида лагьайтIа, азардиз акси рапар ягъун лазим тир ксарин 27% тешкилзава. Къейд авун лазим я хьи, Россиядин здравоохраненидин министерстводи дагъустанвийрин 60 процентдиз коронавирусдиз акси рапар ягъун лазим яз къалурнава. Имни 1 350 407 касдиз рапар яна кIанзава лагьай чIал, абурукайни чпин яшар 60-далай алатнавайбурун кьадар 394 480 кас я.
Дагъларин уьлкведиз коронавирусдихъ галаз женг чIугунин барадай агакьзавай рапар ишлемишунал гьалтайла, Россиядин амай регионрин рекъемар фикирда кьурла, чи республика вилик ква, 91 % тешкилзава.
РикIел хкин: тIугъвал башламишайдалай инихъ Дагъустандиз 504 296 раб агакьнава. Рапар кьуд жуьрединбур ава: “Спутник V”, “Спутник Лайт”, “ЭпиВакКорона” ва “КовиВак”. Малум тирвал, дагъустанвийривай вакцинациядин гьи пунктуна хьайитIани тIегъуьндиз акси раб ягъиз жеда.
Алай вахтунда Дагъустанда тIугъвалдиз акси рапар ядай 86 стационарни мобильный 58 пунк кардик ква. Абуру пакаман сятдин 10-далай нянин сятдин 7-далди кIвалахзава. Раб ягъун патал паспортдин, ОМС-дин полисдин ва СНИЛС-дин копияр хьун герек я.
Чи мухбир
