Дуьньядиз чкIай коронавирусдин тIугъвал завни агакьна. 13-сентябрдилай зи бедендал ифин акьалтна, кефи чIур хьана. Са гьафтеда кьван рапар яна, амма ифин агъуз аватнач. Компьютердин томография (КТ) авуниз мажбур хьана. Жигеррин 20 процентдиз зарар хьанвайди дуьздал акъатна. Тади куьмекдиз эверна, зун азарханадиз фена. Гзафбуру, духтурри яб гузвач лугьуз, шикаятар авуникай чаз муьвал-мукьвал ванер къвезва. Меркезда зун къаткурай Гоголан куьчеда авай садакай масадак акатдай азаррин центрада заз дуьзгуьн къайда аваз акуна. Фейивалди,зун гьеле азарлуяр кьабулдай отделенида амаз, цIийи ахтармишун — тест авуна. Санитаркадихъ галаз 3-мертебадиз агакьарна.
Зун авай палатада цIийиз атанвай 3 кас мад авай. Заз чка къалурайдалай кьулухъ вад декьикьани арадай фенач, палатадиз кьакьан буйдин жегьил духтур руш атана. Ада вич Диана Мегьамедовна — палатадин духтур тирди лагьана, начагъ хьайи хьиз, сагъни хъжедайвилихъ умудлувал къалурна. Зи рикIиз са бубат регьят хьана.
Диана Мегьамедовнади, хиве кьурвал, чун сагъарни хъавуна. Духтур экуьнилай йифен кьуларилай алатдалди азарханада акъваззавай, ял ядай югъ рикIел алачиз кIвалахзавай. Заз гьасятда капельницаяр кутун, ингаляцияр тешкилна, герек дарманарни гана. Абур лагьайтIа, ина вири азарлуйрив агакьарзавай. Бязибурун сиверай ван къвезвайвал, абур жуван пулунихъ маса къачунин лазимвал авачир. Энгел тавуна, азарханада чаз виридаз алава анализар хъувуна. Зи ва амай азарлуйрин анализар са акьван хъсанзавачир (ахъай хъийидай кьилихъайни анализар хъувуна). Чун ина къаткай цIуд юкъуз анализар дуьз къайдадиз хкана. Йикъан-йикъа ивидик квай кислороддин кьадарни ахтармишзавай. Нефес кьазвайбур тIебии тушир жуьреда жигеррин вентиляция ийидай аппаратдик (ИВЛ) кутазвай.
Чаз чир хьайивал, тIугъвалдин сифте йикъалай башламишна, и центрада Алиев Абдулхаликь Гьасановичани зегьмет чIугвазвай. Духтурар экуьнлай няналди азарлуйриз чара-дарман авунин къайгъуйрик квай. Лугьун лазим я хьи, духтурри хьиз, медсестрайрини гзаф зегьмет чIугвазвай. Буйнакскдай, Каспийскдай къвезвай рушарни авай. Сестрайри пуд сменада кIвалахзавай.
Зун къатканвай пуд лагьай мертебада цIуд палата авай. Палатайрилай гъейри, дегьлизрани къатканвай. Гьакьван начагъбуруз килигзавайбур гьар сменада пуд медсестра тир. Абуруз секинвал ерли авачир. Са палатадай муькуьдаз кат-калтугзавай. Капельницаяр йикъа кьве сеферда кутазвай. Садак кутаз, муькуьдакай хкудиз, гьерекатда жезвай.
Санитаркайрини, сятдин экуьнин 5-далай башламишна, михьивилер ийизвай. Йикъа пудра-кьудра кьежей пекиналди полар чуьхуьзвай. Лазимвал аваз хьайитIа, кьве йикъалай простынарни дегишарзавай. ТIуьникай рахайтIа, вахт-вахтунда гузвай, хуьрекрин ери писди тушир.
Заз лугьуз кIанзава, азарлу хьайи виридаз Аллагь куьмек хьурай! Диана Мегьамедовна ва Абдулхаликь Гьасанович хьтин духтурар гзаф хьанайтIа, азарлуяр вири сагъ хъжедай.
Жуван макъала заз ихьтин шиирдалди акьалтIариз кIанзава:
Иеси кьей коронавирус,
Эхир завни агакьна вун.
Сад Аллагьдин куьмекдалди
Асантдаказ алатрай вун.
Зун къатканвай больницада
Духтурри ийизва дава.
Я Сад Аллагь, минет я ваз,
Виридаз хьуй вакай чара.
Им тIал туш, са аламат я,
Кефи жеда гьар жуьреда.
Вириданди са мурад я:
Сад Аллагьди авун чара.
Акьван кIевиз хуьзвай тир за,
Хабарсуздиз цавай къведа.
Йифди-югъди вайзарзава
Сад Аллагьди авун чара.
Са зун патал туш зи вайзар,
Залай фейбур гзаф ава.
Алатрай и душман — тIугъвал,
Я Сад Аллагь, вакай чара.
Мариян Бугаева,
Махачкъаладин 40-нумрадин юкьван мектебдин муаллим
