РД-дин здравоохраненидин министерстводин пресс-къуллугъди хабар гузвайвал, республикада алай вахтунда коронавирусди мад кьил хкажнава…
“Дагъустанда са кьадар вахтунда коронавирусдин тIугъ-вал тIимил зайиф хьанвай , амма и йикъара азарлу жезвайбурун, азарханайриз агакьарзавайбурун кьадар мад гзаф жез гатIуннава. Ихьтин гьалари чак еке къалабулух кутазва. Алатнавай гьафтеда ковиддикди стIалжем хьанвай 997 кас республикадин азарханайриз агакьарнава. Им вилик квай гьафтедилай 17 касдин (а гьафтеда азарханайра 980 кас къаткурнай) гзаф я. ИкI, галаз-галаз эхиримжи кьве гьафтеда азарханайриз агакьарзавай азарлуйрин кьадар анрай сагъ хъхьана хъфизвайбурулай гзаф жезва. Октябрдин сифтегьан 11 юкъуз республикадин ковиддин стационарра 98 кас кьена. Абурукай 82 кас COVID-19 тIегъуьн квайбур (анализралди тестикь хьанвай диагноз авайбур) тир. Гекъигун патал: алай йисан 1-сентябрдилай 11-сентябрдалди 156 кас кьена, абурукай 135-дак коронавирус квай.
Къейд авун лазим я хьи, ковиддиз акси рапар янавайбурун кьадар къенин юкъуз анжах 468 389 кас я. Гриппдиз акси рапар 487 143 касди янава. ТIугъвал акъвазаруниз куьмекдайвал, коллективный иммунитет арадал атун патал и кьадар тIимил я.
Гьуьрметлу дагъустанвияр! Иммунитет арадал атун патал квехъ гьелелигда вахт (вакцинадин кьвед лагьай пай (раб) ягъайдалай кьулухъ ам 3-4 гьафтедин къене арадал къвезва) амазма. Чна квез чIуру гьалар фикирда кьуналди, вахтунда COVID-19 тегъуьндиз акси раб ягъуниз эвер гузва.
И серенжем квевай куьн яшамиш жезвай чкайрин поликлиникайра, гьакIни чIехи центрайра — Махачкъалада авай Исинбаевадин тIварунихъ галай стадиондал, Урусрин театрда, ДГМУ-дин Ленинан куьчеда авай дараматда ва масанра ягъиз жеда. Анра духтурри ахтармишунар кьиле тухун ва раб ягъун патал къулай вири шартIар тешкилнава”, — къейднава министерстводин Инстаграмда авай аккаунтда чапнавай малуматда.
«Лезги газет»
