Июндин варзни акъатзава. Ам йисан кьвед лагьай пай патал газетар, журналар кхьидай вахт я. Чи тарих, уьмуьр, яшайиш вичин чинрилай раижзавай “Лезги газет” кхьиз вирида тади къачу.
Республикадин милли чIаларал акъатзавай вири газетрилай еке тираж авай адал чна дамахзава. Тираж агъуз вегьин чаз кутугнавач. Чи камаллу бубайри лагьайвал, жуван вацI жува чIехи авуна кIанда. Мектебрин директорар кьиле аваз вири муаллимри, ясли-бахчайрин заведующийри, гьар жуьре тешкилатрин къуллугъчийри чпин жумартвал, мергьяматлувал къалурнайтIа, хъсан кар жедай.
Мукьвара газетдин кьилин редактор Мегьамед Ибрагьимов Кьасумхуьруьн чкадин телеканалдай гьа и кардикай раханай. Газет кхьинин месэла ада мад сеферда рикIел хкана. Им, чахъ элкъвена, авунвай тIалабунни я. Ша чна и тIалабун активвилелди кьилиз акъудин. Милли газет вахтунда кхьин. Гьам чи кьилин винизвални, газетпересвални жеда.
Райсудин Набиев
