Коронавирусдин нубатдин лепе къарагънава. Дагъустанда эхиримжи са шумуд юкъуз вирус акатзавайбурун кьадар пуд вишев агакьзава. Ихьтин шартIара еке хаталувал арадал атанва.

И кар фикирда кьуна, республикадин хейлин муниципалитетра мектебар агалнава. РД-дин образованидин ва илимдин министерстводин пресс-къуллугъди хабар гузвайвал, алай вахтунда 12500 аялди арада мензил аваз (дистанционно) чирвилер къачузва.

Къе, 26-январдиз, республикадин Роспотребнадзордин кьил Николай Павлова 1-апрелдалди гзаф кьадар инсанрин иштираквал аваз диндихъ галаз алакъалу мярекатар тухун къадагъа авунва.

Гзаф идарайри, гьа жигьетдай яз «Лезги газетдин» редакциядини, чпин яшар 65 йисалай виниз тирбуруз кIвалахал атун къадагъа авунва. Абуру гьелелиг арада мензил аваз кIвалахдайвал я.

Са гафуналди, коронавирусдин вилик пад кьун патал республикада кьетIен серенжемар кьабулзава. Чакай гьар сада духтурри, пешекарри гузвай меслятрал амална кIанда. И кардихъ чи сагъламвал патал еке метлеб ава. Куьн вири Аллагьди хуьрай!

«Лезги газет»