Алатай нумрада чна хабар гайивал, республикадин районра 2024-йисуз мектебар лап хъсан агалкьунралди акьалтIарай жегьилрив «Чирвилерин рекье кьетIен агалкьунрай» сад ва кьвед лагьай дережайрин медалар, лап хъсандиз кIелнавайди тестикьарзавай яру ва вили рангарин аттестатар вахкунин мярекатар кьиле фена.
ДОКЪУЗПАРА РАЙОНДИН мектебрин выпускникрив-медалистрив лайихлу шабагьар вахкунин шад мярекат муниципальный тешкилатдин кьил Мегьамед Шамилова ачухна. Ада жегьилриз мектебар нетижалудаказ акьалтIарун мубаракна ва гележегда абурухъ неинки чирвилер къачунин рекье, гьакIни кIвалахда виниз тир агалкьунар хьунин алхишдин гафар лагьана, хабар гузва райондин информациядин къуллугъди.
Мярекатда гьакIни райондин депутатрин собранидин председатель Агъашериф Агъакеримова, муниципалитетдин администрациядин ва РУО-дин къуллугъчийри, мектебрин директорри ва диде-бубайри иштиракна.
М.Шамилова лап хъсан нетижаяр хьанвай жегьилрив медалар, муниципалитетдин администрациядин, РД-дин образованидин ва илимдин министерстводин патай чухсагъулдин чарар, гьакIни пулдин савкьатар вахкана.
Алай йисуз Докъузпара райондин мектебар акьалтIарнавай 9 выпускник «Чирвилерин рекье кьетIен агалкьунрай» сад ва кьвед лагьай дережайрин медалриз лайихлу хьана. Къизилдин медалар къачурбурун арада ава: Медина ва Жасмина Османоваяр, Залина ва Зарина Ражабоваяр (Усугъчайдин СОШ); Рамазан Аладинов ва Самира Шихкеримова (ЦIийи Къаракуьредин мектеб); Исми Ибрагьимов (Мискискарин мектеб).
Гимишдин медалриз лайихлу хьанва: Омар Гьуьсейнов (Авадандин мектеб) ва Салимат Ражабова (Усугъчайдин мектеб). Къейд ийин, Усугъчайдин СОШ-дин директор Тажидин Аразовазни райондин администрациядин патай Чухсагъулдин чар гана.
ХИВ РАЙОНДИН мектебар акьалтIарай выпускникар-медалистар тебрикунин мярекатдани муниципалитетдин кьилин везифаяр вахтуналди тамамарзавай Агъамирзе Гьамзабегова, образованидин отделдин начальник Назарали Тарланова ва маса къуллугъчийри иштиракна.
«Чирвилерин рекье кьетIен агалкьунрай» медалар ва тафаватлувилин аттестатар и йисуз райондин 8 выпускникди къазанмишна. Къизилдин медалриз лайихлу хьана: Ибрагьим Агъададашев ва Нажмудин Жафаров (Хивдин СОШ), Амина Назаралиева (Агъа АрхитIрин мектеб), Амина Фаталиева (Кашанхуьруьн мектеб).
Гимишдин медалрин сагьибар: Асият Ярметова, Фатима Ибрагьимова, гьакIни ЦIийи Фригърин юкьван образованидин мектеб акьалтIарай Аскер Бегов ва Имам Керимов.
«Хив райондин кьил Ярмет Алиметовичан ва жуван патай за квез къизилдин ва гимишдин медалар къазанмишун тебрикзава. Агалкьунри куьне чирвилериз серфнавай зегьметдин гьакъиндай шагьидвалзава. Нетижада куьн виридалайни хъсанбурун жергеда ава. Зи мурад куьне савадлувилин рекье зегьмет чIугун давамарун ва лап хъсан пешекарар яз райондиз хтун я», — лагьана Агъамирзе Гьамзабегова, жегьилрихъ элкъвена. Ада выпускникрин муаллимриз ва диде-бубайриз баркалладин гафар лагьана.
Жасмина Саидова
