Эхиримжи йисара милли чIалар, меденият, руьгьдин ивирар авай гьал, виликан йисарив гекъигайтIа, зайиф хьанва. Ихьтин гьалар арадал атанвайди тестикьарзавай делиларни, гьайиф хьи, къвердавай пара жезва: хайи чIаларал акъатзавай изданияр, ктабар кIелзавайбурун кьадар тIимил хьанва, милли чIаларал акъатзавай газетрин, журналрин редакцийра жегьил пешекаррин кьитвал гьиссзава.
Гьалар михьиз пайгардикай хкат тавун патал республикада винидихъ къейднавай месэлайриз талукь яз жуьреба-жуьре серенжемар кьабулзава. Олимпиадаяр, конкурсар кьиле тухунилай гъейри, государстводи грантар малумарзава, махсус проектар кардик кутазва. Гьатта хайи чIаларин гьакъиндай кьилдин къанун арадал гъидай фикирарни ава. Са шакни алачиз, ибур вири герек крар я. Къенин юкъуз и кардиз фикир тагайтIа, пака арадал къведай нетижайри чун пашманарда.
Мукьвара Дагъустандин печатдин летописдиз вил вегьейла, заз республикада чапзавай изданийрин арада “Къурушрин сес” тIвар алай газет акуна. Заз ам ни, гьина, гьикI акъудзавайди ятIа итижлу хьана. Газетдикай лазим делилар чир хьайила, зун шадни хьана, гьа са вахтунда гьейранни. Хайи чIалар хаталувилик квай макъамда дидед чIалал ихьтин газет акъудун шад жедай кар я. Амма “Къурушрин сес” Дагъустанда хуьруьн тек са газет тирди чир хьайила, зун гьейран хьана. Инсанар хайи чIалар хуьниз, еримлу авуниз мукьва авун патал государстводи гьар жуьредин серенжемар кьабулзавай вахтунда къурушвийри, гьукуматдин патай са куьмекни авачиз, чпин хушуналди халкьдин газет акъудзава. И четин девирда гъиле кьунвай и кIвалах регьятбурукай туширдини чаз ашкара я.
“Къурушрин сес” — хайи чIалахъ рикI кузвай халис ватанпересрин, милливал, багъри чIал, бубайрин адетар, ягьни намус хьиз, вине кьазвай кьегьалрин гьакъисагъвилин зегьметдин нетижа я. Аферин чпиз!
За кьилди жуван ва гьакI РД-дин печатдинни информациядин министерстводин вири коллективдин патай “Къурушрин сес” газет акъудуник пай кутазвай гьар садаз 10 йисан юбилей тебрикзава. Къуй “Къурушрин сес” газетдин редакциядин коллективдихъ яратмишунрин рекье мадни еке агалкьунар хьурай!
Рашид АКАВОВ,
РД-дин печатдинни информациядин министрдин везифаяр
вахтуналди тамамарзавайди
