Эмилия Шихрагьимовадикай макъала газетдиз чапдай чIавуз чун адахъ галаз алакъалу тир мад са карди шадарна. ИкI, Дагъустандин халкьдин шаир Расул Гьамзатован 100 йисан юбилейдиз бахшна, музыкадинни драмадин концерт гьазурун патал Россиядин Федерациядин Гьукуматдин Грант Дагъустандин операдин ва балетдин театрдин Эмилия Робертовнади регьбервал гузвай хорди къазанмишнава.
Малум хьайивал, РФ-дин Гьукуматдин Грантдин макьсад «цIийи» Расул Гьамзатов ачухун я, яни музыкада адан шииррин устадвал, кьетIенвал ачухунин, «къалурунин» везифа вилик эцигнава. «Вакай за фикирзава» («О тебе я думаю») кьил ганвай кьетIен концерт-тамаша гьазурунал чи уьлкведин виридалайни хъсан пешекарар желбнава. Кьилди къачуртIа, режиссер-постановщик Дмитрий Павлов ва хореограф Герман Проваторхов кьведни Санкт-Петербургдай я, звукорежиссер Александр Мохаревский — Дондал алай Ростовдай.
Эмилия Робертовнади къейдзавайвал, концертдин бинеда Россиядин ва Дагъустандин композиторрин хордин ва вокалдин гуьрчег чешнейри чка кьада. Шииррай ва прозадай бязи цIарар (фрагменты) драмадин актёрри кIелда (тамамарда). Чи ватанэгьлиди мадни са шумуд «сир» ачухна. ИкI, концертдин вокалдин пай Дагъустандин операдин ва балетдин театрдин солистка Елена Величкоди тамамарда. ГьакIни и проектда иштиракун патал Москвадин Б.А.Покровскийдин тIварунихъ галай Камерный музыкадин театрдин солист, Россиядин халкьдин артист, операдин машгьур манидар Алексей Мочаловаз эвер ганва. Калининграддай атанвай художникри — Рабият Темировади ва Вера Давлитшинади — проектдин винел кIвалахзава. РД-дин лайихлу художник Вера Агошкинади концерт-тамаша патал костюмар гьазурзава. Дагъустандин культурадин лайихлу работник Адил Адильханов экверин кIвалах къайдадик кутунал машгъул я, Дмитрий Павлов –сценографиядал.
— Чаз Расул Гьамзатован шиирриз кхьенвай цIудралди манияр чида, амма академический музыкадикай иллаки акьалтзавай несилдиз тIимил малум я. Гьайиф хьи, ам лап тIимил тамамарзава ва я адан ван саки къвезвач. И кардиз рехъ гана виже къведач. ЦIийи проект себеб яз, Расул Гьамзатован яратмишунрин сергьятар музыкадин искусствода мадни ачух жеда, — къейдзава Эмилия Шихрагьимовади.
Сифте сефер яз концерт-тамаша 19-августдиз Махачкъалада, М.Горькийдин тIварунихъ галай Урусрин драмтеатрдин ЧIехи залда, къалурда. Ам Дагъустандин ва Россиядин шегьерра къалурунни пландик ква.
Гаф кватай чкадал мадни лугьуз кIанзава хьи, Расул Гьамзатов дидедиз хьайидалай инихъ 100 йис тамам хьунихъ, уьлкведин Президентди кьабулнавай Указдихъ галаз алакъалу яз, 11-июлдиз Махачкъалада, Къумукьрин театрда, Россиядин лайихлу артистка Зарифа Абдуллаевадин регьбервилик кваз кьиле фейи концертда Э.Маммадаевади, Д.Октавиана, Е.Величкоди, Д.Федоренкоди ва масабуру чпин устадвал къалурна. Программадик Р.Гьамзатован шиирриз М.Кажлаева, Ш.Чилаева, А.Жафаровади ва маса композиторри кхьенвай музыкадин нумраяр квай.
Регина Семедова
