Къадим Дербентдиз атай гьар са касдиз малум жезвайди шегьердин тек са куьгьне имаратар туш, ина гьар са халкьдиз ва адан культурадиз талукь тир идараярни ава.

Вириладалайни вилик квайди ва вичиз ч1ехи тарих, меденият авайди Ст1ал Сулейманан т1варунихъ галай Лезги театр я. Ада вичин ата-бубайрилай инихъ амай, садалай садал физ кьабул хьанвай, адетар алай вахтунда, къенин йикъарани хуьзва.

Гьа ик1 театрдин коллективди вичин хъсан къиллихрикай сад яз, гьар йисуз Виридуьньядин театрдин йикъан вилик, яшлу, чпи са шумуд йисара гьакъисагъвилелди театрда к1валах авунвай актёррин гуьгуьл къачун я. Театрдин к1венк1вечи векиларни галаз, директор Эминова Динара Мураддиновна театрдин агъасакъалриз мугьман хьана. Ч1ехи актёрар, Россиядин лайихлу артистар тир Абдурашид Махсудоваз ва Адуллагь Гьабибоваз алукьзавай Виридуьньядин театрдин югъ мубаракна ва Дагъустандин культурадин министр, Бутаева Заремадин, патай, гзаф йисара Лезги театрдиз ва Дагъустандин искусство вилик финин карда къуллугъ авунай, театрдин директор Динара Мураддиновнади театрдин югъ мубаракнавай «Баркалладин чарар» вахкана.

Шад хьайи агъсакъалри рик1ин сидкъидай театрдин коллективдиз ва ч1ехи регьберриз, чеб саймиш авунай, алхишрин гафар лагьана.

Яшлу актёррин шадвилихъ и кьил, а кьил амачир.

Эминат Загьирбегова