Сулейман-Стальский райондин Герейханован 1-хуьруьн “Сухой поселокдин” гуьне пата тIебиатдал рикI алай камаллу инсанри са шумуд чкадал хатрутдин къелемар акIурнай. Амма, гьайиф хьи, тIебиатдин къадир авачир са бязи ксари абур, хилер хаз, кьурурна.
Са бязи келлебазри тамун юкьвара, кул-кусрин къваларив цIаяр хъийиз, чиркинвилер арадал гъизва, акIурнавай къелемар кукIварзава.
Герейханован хуьруьн кьиле авай Гуьне пата 25-30 йисан вилик рагьметлу Закидин Ризаева, базардилай къачуна, хатрутдин къелем акIурнай. ЧIехи жедалди ам элкъуьрна кIевирни авунай. Къвалавай физвай ДаркIуш-Сардаркент цин турбадай булахни акъуднай.
Гьар вахтунда гуьзчивални ийиз, ядни гуз, тар чIехи, адалай аватай хатрутар малари, лапагри, ничхирри нез хьана. Чими вахтунда тарцин сериндик лапагри ял ядай.
Эхиримжи вахтара, Закидин Ризаев рагьметдиз фейидалай кьулухъ, анихъ гелкъведай кас амукьнач.
Гьайиф хьи, гьукуматда дегишвилер хьуникди халкьдин арада гьуьрмет-хатурни рикIелай фена. Мердимазар тир бязи жегьилриз ва аялриз тарцин кIаник цIаяр хъийидай чка хьана. Сифте кудай кIарасар инай-анай гъиз, гуьгъуьнлай гьатта тарцин хилерни хаз, цIаяр хъувуна, аялри резиндин чархарни кваз тухуз хьана тарцин кIаник. Мукьвал алай кIвалера авай диде-бубайри чпин аялри ийизвай и чIуру кIвалах-риз са манийвални авунач.
Школада гузвай тербия кIвализ хтайла рикIелай алатзава. Чун икьван агъайна куьз хьанватIа?!
Келледа гар авай, кIвалахрал алачир са бязи ксариз тарцин кIаник “духан” хьанва. Анрал баклажкаярни эрекьрин, пивойрин бутылкаяр гадарна аквазва.
Алай вахтунда тарцикай, хилер хана, эйбежерди хьанва (шикилда). Яраб и писвал низ ятIа? ТIебиат хуьн гьар са касдин везифа тирди рикIелай алудна кIандач.
«Лезги Газет»
