Ахцегьа багъларани никIе­ра кIвалахна, анрай бул бегьерар кIватI хъийизвай ксар тIи­мил авач. Арадал гъанвай артухан продукция маса гуналди абуру чпин дуланажагъ хъсанарзава.

Жамалдин Бабаевни ахьтинбурун жергедай я. Ам жегьил чIавалай чилел ашукь кас я. Совхозар амай йи­сарани ада “Ахтынский” сов­хозда фялевиле кIвалахна. А чIавуз ада вичел тапшурмишзавай гьи кIвалах хьайи­тIани вахтунда ва хъсан ери аваз тамамардай. Ада гьар йикъан планар 120-140 процентдин тамамариз, пулдин премияр къачудай. Бегьер кIватI хъийизвай чIавузни ам амайбуруз чешне тир.

Алай вахтунда Жамалдин Бабаевахъ “Кал” участокда 30 сотых чил ава. Ада вичин участок хъсандиз кIеви авунва, хъсан багъ арадал гъанва. Вич яшамиш жезвай кIва­лерикай и чка хейлин яргъа аватIа­ни, Жа­малдин гьар юкъуз вичин багъда кIвалахар авунал машгъул яз аквада. Ам пакамахъ велосипеддал алаз вичин участокдиз физва. Ада гьар юкъуз чIугвазвай гьа­къисагъ зегьметди хъсан нетижаяр гузва.

Къейд авун лазим я хьи, адан багъда бубайрин сортарин ичер, чуьхверар ва маса емишар ава. Идалайни гъейри, Жамалдинан кIвалин виликни 15 сотых чил ква. Адахъ­ни ам ие­сивилелди гелкъвезва. Жамалдинахъ вичин къелемлух ава. Ада инидин тIурар кутунвай къелемарни гьазурнава.

Хъсан зегьметчи тир Жамалдин Бабаева гьар йисуз ви­чин кIвачихъ галай багъларай векьерни язава ва абурукай туькер гьазуруналди артуханбур маса гузва. Алай йисузни ада вичин участокрай векьин хейлин туькер гьазур­нава. Чилел рикI алай халис багъманчидиз акъвазун авач. Зулухъни и касди къведай йисан бул бегьердин бине кутун­ патал тарарин пунариз перер яна, абуруз зулун ятар гана. ХъуьтIуьн вахтунда ада, менфятлу я лугьуз, тарарин пу­нарихъ жив кIватIзава. И карди­ та­рарин бегьерлувал артухарзава.

Рагьидин ЭМИНОВ