Алатай гьафтеда Махачкъалада кьейидалай кьулухъ Россиядин Игитдин тIварцIиз лайихлу хьайи СВО-дин иштиракчи Султан Сулейманован диде-бубадив Россиядин Игитдин «Къизилдин Гъед» вахкана.
Мярекатда РД-дин Кьил Сергей Меликовани Кьибледин военный округдин регьбердин заместитель, генерал-лейтенант Владимир Кочеткова иштиракна.
«Чи уьлкведи, чи халкьди вичин аслу туширвал хуьзва. Султан хьтин ватанпересри чпин кьегьалвилералди, жуьрэтлу уьмуьрдалди чаз бахтлу гележег тазва. Виридаз чизва, Султанан къаст шабагьарни тIварар къачун тушир. Ватан хуьн ада вичин асул везифа, эвелимжи буржи яз гьисабзавай. Намуслу офицердин буржи. Хцин, стхадин буржи. И буржи ада тамамвилелди кьилиз акъудна. Чна вирида Султан чи ватанэгьли хьунал дамахзава. Адан экуь къамат эбеди яз дагъустанвийрин рикIера амукьда. Ам эбеди авун патал чна вири къуватар желбда», — лагьана Сергей Меликова, Игитдин диде-бубадихъ элкъвена.
РикIел хкин, Султан Сулейманован бинеяр Кьасумхуьрелай я. Вичин куьруь уьмуьрда (телеф хьайила, адан 27 йис тир) кьегьал дагъвидихъ еке агалкьунар хьана. Адаз пуд сеферда «Жуьрэтлувиляй» орден, «Ватандин вилик лайихлувилерай» ордендин II дережадин, «Дирибашвиляй», «ВикIегьвиляй» (I ва II дережадин), «Женгера тафаватлу хьунай» медалар гана. Телеф жедалди са тIимил вахт вилик кьегьал офицер подполковникдин чиндиз лайихлу хьана. 27 йиса аваз ихьтин дережа къачун тек-туьк жезвай дуьшуьш я.
Агьмед Магьмудов
