Гъалибвилин суварин югъ мукьва хьуникди дяведин зулуматдин йисара чи бубайрални дидейрал гьалтай мусибатдин девир, абурун кьегьалвилер, абуруз хьайи дарвилер, дердерни хажалатар фикирдиз къвезва.
И мукьвара зи гъиле Ватандин ЧIехи дяведин иштиракчи, уллугъетягъви Гьабибов Рамазан Шагьпазовичан чарар, цIарар, документар гьатна. 1941-йисуз Яру Армиядин жергейриз эвер гайи дагъвидин уьмуьр зи вилерикай карагзава. Хайи хуьруьн ва Вини Хъартасрин сифтегьан классрин жегьил муаллим, 24 йис хьанвай Рамазанакай сифте Тифлисдин пехотадин военный училищедин курсант жезва. Гуьгъуьнлай взводдин командир яз ада Кавказ азад авунин къати женгера иштиракзава, 1943-йисан гатфариз эрчIи гъилел залан хер хьуникди, гадни зул госпиталра акъудай Рамазан Гьабибов йисан эхирдай кIвализ ахъай хъийизва… Гъиле гьатай материалрай малум жезвайвал, жегьил офицерди игитвилелди Ватандиз къуллугъна, ам гьукуматдин са шумуд шабагьдин, гьа жергедай яз “Жуьрэтлувиляй” медалдин сагьиб тир.
Шиирар теснифунални адан рикI алай. Дяведин цIаяра хайи ватандихъ, багърийрихъ вил хьайила Рамазан Шагьпазовича кхьенвай шиирар авай дафтарни чал агакьнава. Шииррай чаз дидедиз, кIани рушаз, стхадиз еке гьиссеривди кхьенвай цIарар аквазва.
Вуч кар хьанай — кIан хьана вун,
Ви фикирди кьурурна зун.
Метлебарихъ агакьнач чун,
И дуьньядал, алагуьзли.
(21-декабрь, 1941-й.)
Гайи тапшуругъ къведайла зун дяведиз,
Авунач лагь ажузвал за душмандиз.
Гуьлле гана лагь за инсафсуз фашистриз,
Ватан патал фена лагь зун дидедиз.
(28-март, 1943-й.)
Шаирвилин руьгь авай жегьилди гуьгъуьнлай хьайи ислягь уьмуьрдани ихтибар авур вири къуллугърал яратмишунин тегьерда зегьмет чIугуна. 1945-йисан сентябрдиз Р.Ш.Гьабибов областдин партийный школадиз рекье туна. Ам акьалтIарайдалай кьулухъ ада сифте КПСС-дин Кьурагь райкомдин пропагандадин отделдин заведующийвиле, ахпа КПСС-дин обкомдин инструкторвиле кIвалахна. 1951-йисуз Рамазан Гьабибов партиядин Кьурагь райкомдин кьвед лагьай секретарвиле хкяна, пуд йисалай Кьасумхуьруьн районда заготовкайрин Управленидин кьиле акъвазна. Кар алакьдай тешкилатчиди са шумуд йисуз “Рычал-су” заводдин директорвиле, КПСС-дин райкомдин инструкторвиле ва маса жавабдар къуллугърал михьивилелди, вичелай рази жедай гьалда кIвалахна.
Рамазан Шагьпазовичаз 5 велед — пуд рушни кьве хва хьана. Тельман, ФатIимат ва Чрагъхалум бубадин рекьяй фена — муаллимвална, Феридади духтурвилин пеше хкяна, Эдмонакай гьуьлерин офицер хьана. ЧIехи руш ФатIимата вичин вири уьмуьр аялриз бахшна, 40 йисан къене ада ЦIийи Макьарин аялриз чирвилер гана. Играми бубадилай амай ирсинихъ галаз чун танишарайдини гьам я. ЧIехи бубадин тIвар ФатIиматан хва Робертан гъвечIи гададал эхцигнава. Адан гьеле йисни хьанвач. Къуй чIехи бубадин тIвар хуьзвай гъвечIи птул михьи, ислягь цавун кIаник чIехи хьурай! Бубадиз акурбур адаз гьич ахварайни такурай!
ЧIехи Гъалибвилин 75 йисан вилик чна чи баркаллу ватанэгьли, адан экуь къамат, тIвар еке гьуьрметдивди рикIел хкизва. Гьич са касни, гьич са шейни рикIелай ракъур тийин!
Мизамудин Магьмудов
