Сулейман-Стальский райондин хуьруьн майишатдин зегьметчийри багъларай къене ири цил авай емишар кIватI хъийизва. Санлай къачурла, районда и жуьредин емишрин багълари 2 агъзур гектардилай виниз майданар кьунва. Абурукай 320 гектарда — алучаяр, 120 гектарда шефтелар битмишарзава. ПIинийрикай, хутарикай, рахайтIа, абур агьалийрин ва лежбервилинни фермервилин майишатра, арендадиз къачунвай чилерал гьасилзава.
Алай вахтунда багъманчийри 7 агъзур тонндилай виниз емишар кIватI хъувунва, гьа гьисабдай яз — 2500 тонн шефтелар, 3800 тонн хутар. Гьисабар кьурла, юкьван гьисабдалди гьар са гектардай 100 центнер бегьер къачузва.
Пешекарри ва муьштерийри къейд ийизвайвал, райондин багъманчийри гьасилзавай емишрин ери лап винизди я. ИкI тирвиляй абурухъ муьштерийрин патай игьтияжни ава. Райондин багълариз республикадин шегьеррай ва районрай емишар маса къачуз оптовикар къвезва.
Райондин хуьруьн майишатдин ва суьрсетдин управленидин пешекаррин гафаралди, гьар йисуз емишрин багъларин майданар артухарзава, мумкинвал авай вири чкайра цIийи багълар кутазва. Алай йисан зулузни 440 гектарда цIийи багълар кутада.
«Лезги газет»
