РФ-дин просвещенидин министр Сергей Кравцова алукьзавай кIелунин цIийи йисуз кIвалах тешкилунин асул хилер тайинарна. ИкI, 1-сентябрдилай уьлкведин школайрин классрин руководителриз гьар вацра 5 агъзур манатдив агакьна алава пул гуда. ГьакIни сифтегьан школайра кIелзавай аялриз чими хуьрекар гун таъминарунин проектни кардик кутазва.
“РФ-дин Президентдин и кьве тапшуругъ кьилиз акъуддайдал чна шаклувалзавач”, — къейдна ада.
Министрди уьлкведин мектебра кIелунин йисаз гьазур хьунин кIвалах худда кьиле физвайдакай лагьана ва эпидемиологиядин жигьетдай авай гьалари алукьзавай 1-сентябрдиз мектебра шад линейкаяр кьиле тухудай мумкинвал гудайдак умуд кутуна.
“Государстводин сад тир имтигьан (ЕГЭ) тешкилунин карда чахъ кIватI хьанвай вири тежриба чна мектебра чирвилер гунин кIвалах тешкилунин рекье ишлемишда. Аялар ва муаллимар патал хатасузвал таъминарун патал Роспотребнадзордин вири истемишунар гьисаба кьада”, — лагьана ада.
Сергей Кравцова къейд авурвал, кIелунин йисан эвелдай аялрин чирвилер ахтармишда — ида хьанвай нукьсанар, кимивилер тайинариз ва, лазим хьайитIа, методикадин жигьетдай куьмекдай мумкинвал гуда. “И кIвалахрай къиметар эцигдач. Чаз аялрин чирвилерин гьакъикъи дережа чир хьун лазим я — эгер чирвилерин кьитвал арадал атанватIа, ам арадай акъудун патал вири серенжемар кьабулна кIанда”, — малумарна ада.
Министрди къейд авурвал, кIелунин цIийи йисуз чирвилер гунин адетдин къайда яргъал мензилда аваз кIелдайдалди эвезун фикирда кьунвач.
“Чахъ дистанционный къайдада чирвилер гунал элячIдай фикирар авач. Ихьтин къайдадихъ са кьадар артуханвилер аватIани, чна ам анжах алава къайда яз гьисабда кьунва. Муаллимар ва аялар патал цIийи мумкинвилер яргъал мензилда аваз кIелдай къайдадин куьмекдалди тешкилда, амма ибур алава мумкинвилер я”, — лагьана министрди.
«Лезги газет»
