Къенин гьакъикъат ахьтинди я хьи, лезги халкьдин векилар Россиядин Федерациядин гзаф реги­онра яшамиш жезва ва абуру чпелай алакьдайвал зегьметни чIуг­ваз­ва.

Тюмендин областдикай ра­хайтIа, ина  лезгийрин  сагъ хуьрер, посело­кар, шегьерра еке магьлеяр арадал атанва. Гьа ихьтинбурукай яз завай Покачи шегьердин тIварни кьаз же­да. Чи уьлкведин къад миллетдин векилар дуствилелди яшамиш жезвай ина лезгийрин кьадар гзаф я.

Лугьун лазим я хьи, шегьердин администрацияди миллетрин арада­ дуствилин алакъаяр мадни мягь­кемарун патал гьар са халкьдин культура, адетар, чIалар чируниз талукь жуьреба-жуьре мярекатар кьиле тухузва. Милли общест­венный организацийриз чпин культура вилик тухудай шартIар­ни тешкилзава. Покачи шегьерда акьалтзавай несилдиз ва гьакI маса миллетрин векилриз жуван культура чириз алахъзавай тешкилатдик Лезги халкьарин Виридуьньядин конгрессдин Ханты-Мансидин “Лезгияр” тIвар алай региональный отделенини акатзава.

Адаз ХМАО-Юградин КПРФ-дин округдин комитетдин идеологиядин рекьяй ва КПРФ-дин Покачи шегьердин комитетдин секретарь  Жалауддин  Абдуразакьова  регьбервал гузва. Ам гьакI РФ-дин Госдумадин депутатдин куьмекчи, шегьерда вирида гьуьрметзавай инсан я. Имни дуьшуьшдин кар туш. Ам вичихъ галаз алакъалу­, са­нал кIвалахзавай, яшамиш жезвай гьар са миллетдин векилрив  ин­­санвилелди, гьуьрметлувилелди эгечI­зава. Гьар садаз вичелай алакь­дай куьмек гуз алахъзава.

Шегьерэгьлияр адахъ галаз­­ “гьуьр­мет­лу­ди” лугьуз рахазва. Ада ше­гьерда яша­миш­ жезвай чи жегьил векиларни маса миллетрив гьуьрметдивди эгечIун патал да­тIана гъавурдик кутунин кIвалах тухузва.

Жалауддин Загьидиновича хейлин йисара шегьердин администрацияда кIвалах­на ва жегьилрихъ галаз алакъалу месэлаяр гьялна. Гилани ам жегьилри тешкилзавай вири мярекатра иштиракиз чалишмиш жезва, абурук ватанпересвилин руьгь кутадай суьгьбетар ийизва. Советрин Союзда жуьреба-жуьре миллетрин векилар дуст­вилелди, са хизан хьиз, гьикI яшамиш хьа­натIа, абуру Ватандин ЧIехи дяведа  гьикI гъалибвал къа­занмишнатIа, рикIел хкида.

Акьалтзавай несилдик ватанпересвилин руьгь кутуниз куьмек гузвай мярекатрик милли суварарни акатзава. Им хейлин йисар я Покачи шегьерда Яран сувар кьиле тухуз.И гуьзел мярекатдик шегьерда авай маса миллетрин векилризни теклифзава.

Мисал яз, цIи шад гьалара ва гурлудаказ кьиле фейи Яран суварик иштиракай мугьманри чаз ихьтин ихтилатар авуна.

Светлана: “Зун лезги туш. Гъуьл лезги тирвиляй чи аялриз лезги чIал, адетар, ватандашар чир хьун патал зун гьамиша аяларни галаз лезги мярекатрик къвезва. Яран сувар рикIиз пара хуш сувар я”.

Шафига  Урдиханова: “Зун Азербайжан Республикадин Сумгаит шегьерда дидедиз хьана. Лезгивал бинедилай ивидик ква. Ина жезвай милли суварарни, концертарни, мехъерарни ахъайзавайди туш. За еке ашкъидалди лезгийрин Яран суварикни, азербайжанрин Навруз-байрамдикни иштиракзава”.

Жамиля: “Зун башкирви я, заз лезги мярекатдик теклифун пара хуш хьана. Лугьун хьи, лезги халкьни, лезги суварарни тарифдиз лайихлубур я”.

Покачи шегьерда “Лезгияр” региональный отделениди тешкилзавай жуьреба-жуьре мярекатра чи ватанэгьлияр тир “Дорстройсервис” ООО-дин участокдин начальник Фахрудин Мирзаметова, “Кристалл” тIвар алай муркIадин дворецдин къуллугъчи Сурия Разахановади, шегьердин  ГИБДД-дин начальник Нурудин Рама­занова, шегьердин мискIиндин виликан имам Саади Омарова, шегьердин  образованидин идарайрин профкомдин председатель Мильвара Рамазановади, афгъанви аскер-ветеран Фейрудин Гьайвазова, Лангепассдин  политехнический колледждин тарихдин муаллим Шавлет Пашаева, Покачи шегьердин Думадин депутат Идрис Ражабова гьевесдивди иштиракзава ва жуьреба-жуьре рекьерай куьмекарни гузва­.

Къейд авун лазим я хьи, жуванбур кIватI жезвай чкайрал акьалтзавай несилри къазанмишзавай агалкьунризни дуьзгуьн къимет гузва, абурун ашкъи-гьевес артухардай галайвилер ийизва. ИкI, 1-нумрадин школадин 4-“а” классда кIел­завай Имам Рамазанов муркIадал авахьунар ийизвайбурун акъажунра са шумуд сеферда гъалиб хьа­на. 4-нумрадин школадин 6-“в” классда кIелзавай Муьгьуьдин Султанов сирнавдайбурун акъа­жунра тафаватлу хьана. Ихьтин жа­ванри амайбурузни чешне къалурзава.

Са рахунни алач, гзаф инсанрин иштираквал аваз тешкилзавай мярекатар жумарт рухвайрин куьмек галачиз кьиле фидач. Чна гьа ихьтин спонсорар тир Альберт Мусаеваз, Зафидин Алидароваз, Сулейман Керимоваз сагърай лугьузва.

Адалят  Адигуьзелов