Квез чидани?
— Дуьньяда виридалайни чIехи там Сибирдинди я. Кьвед лагьай чкадал Кьиблепатан Америкадин там (джунгли) ала.
— Тарар-тамар авачир континент анжах Антарктида я. Амма, алимри фикирзавайвал, дуьньядин гьаваяр дегиш хьун фикирда кьуртIа, виш йисалай хьиз Антарктидадани сифтегьан тарар пайда хьун мумкин я.
— Цацар алай тараривай бязи дуьшуьшра цIузни дурум гуз жеда.
— Дуьньядал алай кьван вири тамарин саки са пай тропикра ава.
— Тарарихъ еке къуват ава. Абурун хилери чпиз къванерайни, чиле цанвай къирдайни рехъ жагъурда.
— Дуьньядин электричестводин 40 процент кIарасдин цIивинар кунин куьмекдалди арадал гъизва. Энергетикадин куьгьне девирдин къайда алай вахтунда асул гьисабдай Африкадин уьлквейра машгьур я, и карди тамариз еке зарар гузва.
— Кьиблепатан Америкадин Суринам дуьньяда виридалайни гзаф тамар авай уьлкве я. Адан майдандин саки 98 процент тамари кьунва.
— Чилин кьураматдин майданрикай 30 процент кьван тамари кьунва. Кьве виш йис идалай вилик майдандин 60 процент тамарал гьалтзавай.
— Тамар къвердавай тIимил хьуниз килигна, бязи уьлквейра абур артухарунин еке серенжемар кьабулзава. Гзафни-гзаф Китайда, Бутанда ва Филиппинра цIийи тамар кутазва.
— Кеферпатан Америкада авай, “Гиперион” тIвар акьалтнавай секвойя тар дуьньяда виридалайни кьакьанди яз гьисабзава. 115,6 метрдин кьакьанвал авай а тарцин яш тахминан 2700 йис я. Тарарин жуьрейрикай секвойя дуьньяда виридалайни кьакьанди я.
— Чун яшамиш жезвай Чилел инсанрилай гзаф тарар ала.
«Лезги газет»
