14-январдиз Махачкъалада РД-дин Кьил Сергей Меликован регьбервилик кваз совещание кьиле фена. Республикадин вилик акъвазнавай хци месэлайриз талукьарнавай гуьруьшда региондин Гьукуматдин членри, шегьерринни районрин кьилери иштиракна.
Кьилди къачуртIа, зирзибил гьялунин месэлайрикай рахадайла, РД-дин тIебиатдин ресурсрин ва экологиядин министр Ратмир Расулова хабар гайивал, хейлин муниципалитетра зирзибил гадардай махсус бакрин ва абур эцигдай майданрин кьадар лап тIимил я. Сергей Меликова муниципалитетрин кьилериз февралдин эхирралди бакар эцигдай чилин участокар чара авунин, бес кьадар бакар маса къачунин гьакъиндай тапшуругъ гана.
Совещанидал ришветбазвилин, бюджетдин пулар чуьнуьхунин вилик пад кьун патал кьабулзавай серенжемрикайни рахана. С. Меликова къейд авурвал, эцигунрин, образованидин, здравоохраненидин, яшайишдин хилера бюджетдин пулар чуьнуьхнавай дуьшуьшар винел акъуднава. Са ГУП-да гьатта гьукуматдин такьатрихъ маса къачунвай 4 ноутбукни чуьнуьхнавайди винел акъуднава. Республикадин Кьили къанун-къайда хуьдай органрал и жигьетдай кьабулзавай серенжемар давамарун ва тахсиркаррив къанун-къайдадин бинедаллаз жаза агакьарун тапшурмишна.
Гегьеншдиз РД-дин Кьилин сайтдай кIелиз жеда.
Агьмед Магьмудов
