35 ЭЗС эцигна
2024-йисуз Дагъустанда электромобилар зарядка ийидай 35 станция эцигна. Идакай, РД-дин энергетикадин ва тарифрин министерстводин телеграм-каналдал асаслу яз, «Интерфакс» изданиди хабар гузва.
Ведомстводин телда раижзавай къейдерай гъавурда акьазвайвал, датIана гьерекат таъминарун патал вири ЭЗС-ар (электрозаправочные станции) гзафни-гзаф федеральный ва региондин шегьрейра, гьакIни шегьеррин округрин мулкарал эцигнава.
Чешмеди гъизвай делилрай малум жезвайвал, кьилди къачуртIа, 18 ЭЗС — Махачкъаладин мулкарал, мад 3 станция — Къарабудахкент районда, гьарна 2 станция Къизилюрт, Хасавюрт, Избербаш шегьерра ва Къумторкъаладин, Къаякентдин, Мегьарамдхуьруьн районра, гьарна 1 станцияни Дербент ва Каспийск шегьерра эцигнава.
«Интерфакс» изданидиз РД-дин энергетикадин ва тарифрин министерстводи хабар гайивал, санлай къачурла, Дагъустандин мулкарал 40-далай виниз ЭЗС-ар эцигнава.
14 процентдин артухарда
Дагъустанди 2025-йисуз ремонт хъийидай рекьерин кьадар 14 процентдин артухарда. Идакай, махсус чешмедал асаслу яз, «Дагъустан» РИА-ди кхьизва.
Кьилди къачуртIа, агентстводи РД-дин транспортдин ва рекьерин майишатдин министр Жамбулат Салавован гафарал асаслу яз хабар гузвайвал, алай йисуз Дагъустанда 500 километр региональный рекьер ва 13 муьгъ ремонт хъувун пландик кутунва.
Раижзавай къейдерай малум жезвайвал, и макьсадар патал федеральный ва региондин бюджетрай 21,5 миллиард манат пулдин такьатар чара авун фикирда кьунва.
Жамбулат Салавова рикIел хкайвал, 2024-йисуз «РД-дин транспортдин комплекс вилик тухун» программадай Дагъустандин транспортдин сетар вилик тухун патал 15,9 миллиард манат пландик кутунвайвал харжнава. Чешмеди гьакIни хабар гузвайвал, нормативдив кьадай къайдадиз 440 километрдилай виниз рекьер ва, чпин мензил 965 метрдикай ибарат тир 18 муьгъ хканва.
Акъвазардай чка дегишнава
11-январдилай Махачкъалада 4-нумрадин автобусдин маршрутдин гьерекатдин схема дегиш хьанва. Идакай, шегьердин Администрациядин транспортдин, алакъадин ва рекьерин майишатдин управленидал асаслу яз, «Дагъустан» РИА-ди хабар гузва.
Чешмеди къейдзавайвал, эвелан («конечная») акъваздай чка Жабраилован куьчедилай 48-нумрадин школадал хканва, Хушетский ва Хаппалаеван куьчеяр сад-садал гьалтзавай чкадал. ЦIийи маршрут Жабраилован, Общественная, Макаеван, Хушетский куьчейрай физва.
Чешмеди гьакIни раижзавайвал, гьерекатдик дегишвилер кухтуни ЦIийи Кяхулай поселокдин агьалийриз улакьри къуллугъун хъсанарда.
Пешекарри къачунва
«Дагэнергодин» пешекарри «УАЗ» маркадин бригададин 17 автомобиль къачуна. Идакай «Дагъустан» РИА-ди хабар гузва.
Чешмеди, филиалдин пресс-къуллугъдал асаслу яз, раижзавай делилрай гъавурда акьазвайвал, чкадин цIийи автомобилар, жуьреба-жуьре рекьерай финал гьалтайла, хъсан патахъай тафаватлубур, уьлкведин четин накьварив ва гьавадив (климатдив) кьадайбур, гьакI техникадин жигьетдайни хъсанбур я.
Санлай къачурла, 2024-йисуз «Кеферпатан Кавказдин Россети» компанияди Дагъустанда авай энергетикрив 49 уьлчме цIийи техника агакьарнава: автовышкаяр, экскаваторар, кранар, лабораторияр. Къейдзавайвал, «Дагэнергодин» филиалдин автопарк цIийи авунин серенжем 2025-йисузни давам жеда.
Муса Агьмедов
