Жуьреба-жуьре банкари чпин муьштерийриз картаяр ишлемишунин патахъай хатасузвал тестикьарзаватIани, лутуйри чарадан такьатар чуьнуьхдай цIийи-цIийи амалар, рекьер жагъурзава. Йисан вахтунда чи уьлкведа лутуйри ватандашрин картайрин счетрилай къанунсуздаказ чуьнуьхзавай пулдин умуми кьадар миллиарддилайни артух жезва.
Банкунин картадикай менфят къачузвайбур эвелни-эвел чеб гзаф мукъаят хьун, шаклу нумрайрай зенгерзавайбурун чIалахъ тахьун, абуру теклифзавай са гьихьтин ятIа “къуллугъар” кьабул тавун герек я.
Картада авай пулдин такьатар гуя лутуйриз чуьнуьхиз кIанзава лугьуз, халисан лутуйри картайрин сагьибриз зенгзава ва чпин чIалахъ жезвай ксаривай герек делилар къачузва, нетижада картайра авай пул вири чуьнуьхзава. Эхиримжи вахтара, хатасузвал хуьнин къуллугъчияр я лагьана, тапарарзавай лутуярни тIимил туш. Гуя са ни ятIа ви кIвачихъ къанунсуздаказ кредит къачузва лугьуз, зенгер ийиз, алцурарзавай дуьшуьшар малум я.
Жуьреба-жуьре кьуьруькарни уюнар акъудуналди, лутуйри картайрин сагьибар тешвиш гьалда твазва, абурун кьил какадарзава. Гьелбетда, лутуйрин чилина вирибур гьатзавач, амма абур чпин макьсаддив агакьзавай дуьшуьшар мукьвал-мукьвал жезва. Гьавиляй абуру чпин “ пеше” давамарзава.
Лутуйри чпин къанунсуз ва инсафсуз гьерекатар малуматрин «Авито» сайтдин куьмекдалдини ийизва. И сайтда са вуч ятIа маса гун патал вичин малумат раижнавай касдиз лутуйри, гуя муьштери я лагьана, зенгзава ва метягьдин гьакъи карточкадин куьмекдалди ракъурун теклифзава. Метягь маса гузвай касди, тапан муьштеридин шартIунал рази хьуналди, вичин картадин нумра ракъурзава. Картадин нумра чир хьайи лутуди тади гьалда онлайн-сбербанкда а нумраяр регистрация ийизва ва сагьибдивай, гуя гьахъ-гьисаб патал, СМС-пароль лугьун тIалабзава. ИкI, эгер картадин сагьибди СМС-паролар тапан муьштеридиз лугьуз хьайитIа, лутуйрин кьуьруькар декьикьайрин къене кьилиз акъатда.
Инал къейднавай жуьрейрилай гъейри, лутуйри чарабурун картайра авай пулар вирусрин программайрин куьмекдалдини чуьнуьхзава. Игьтиятлу хьухь!
Чи мухбир
